រោគសញ្ញាជំងឺបេះដូង ដែលអ្នកគួរចាប់អារម្មណ៍
សុខភាព៖ ជំងឺសរសៃឈាមបេះដូង និងជំងឺខ្សោយបេះដូង ឬជំងឺគាំងបេះដូងសុទ្ធតែជាបញ្ហាបេះដូង ដែលត្រូវការការព្យាបាលខុសៗ គ្នា ប៉ុន្តែអាចមានរោគសញ្ញាប្រកាសអាសន្នស្រដៀងគ្នា។ យកល្អគួរតែពិគ្រោះជាមួយគ្រូពេទ្យដើម្បីអាចទទួលបានការធ្វើ រោគវិនិច្ឆ័យដែលត្រឹមត្រូវ និងព្យាបាលទាន់ពេលវេលា។
រោគសញ្ញាញឹកញាប់បំផុតរបស់ជំងឺសរសៃឈាមបេះដូង គឺការឈឺដើមទ្រូង ការឈឺដើមទ្រូងបែបនេះអាចជាការមិនមានផាសុខភាព, ធ្ងន់, មានអ្វីរឹត, ឈឺ, ក្រហាយ, ណែន, មានអ្វីសង្កត់, ឈឺចាប់ខ្លាំងក្នុងទ្រូង។ វាអាចច្រឡំនឹងអាការៈក្រហាយដើមទ្រូងដែលបណ្តាលមកពីក្រពះមិនរំលាយ អាហារ។ ការឈឺដើមទ្រូងក៏អាចអោយមានអារម្មណ៍ឈឺចាប់ចាក់ទៅស្មា, ដៃ, ក, បំពង់ក, ថ្គាម ឬខ្នងផងដែរ។
រោគសញ្ញាផ្សេងៗទៀតមានដូចជា ពិបាកដកដង្ហើម, ញ័រដើមទ្រូង (បេះដូងដើរខុសចង្វាក់) ,បេះដូងដើរញ៉ាប់ជាងមុន ,អស់កម្លាំង ឬវិលមុខ ,ចង្អោរ ,បែកញើស បើសិនជាអ្នកចាប់ផ្តើមមានរោគសញ្ញាថ្មីៗ ឬរោគសញ្ញាចាស់ៗនោះកាន់តែកើនឡើងញឹកញាប់ ឬធ្ងន់ធ្ងរ អ្នកគួរតែពិគ្រោះជាមួយគ្រូពេទ្យដើម្បីអាចទទួលបានការធ្វើ រោគវិនិច្ឆ័យដែលត្រឹមត្រូវ និងព្យាបាលទាន់ពេលវេលា៕ វត្តី/Cambodia News
