អ្នកនាំពាក្យក្រសួងព័ត៌មាន ៖ ស្ថានភាពនិងបរិយាកាសនៃការអនុវត្តវិជ្ជាជីវៈសារព័ត៌មាននៅកម្ពុជាប្រព្រឹត្តទៅក្នុងស្ថានភាពល្អ
សារព័ត៌មាន Cambodia News/
ភ្នំពេញ (២ ឧសភា ២០២១) ៖ លោក មាស សុភ័ណ្ឌ អ្នកនាំពាក្យក្រសួងព័ត៌មាន បានលើកឡើងថា ក្នុងឱកាសទិវាសេរីភាពសារព័ត៌មានពិភពលោកឆ្នាំ២០២១នេះ បើទោះបីពុំមានធ្វើពិធីជួបជុំធំដុំ ដូចតែងប្រារព្ធកន្លងទៅដោយសារស្ថានភាពនៃជំងឺកូវីដ១៩ កំពុងគំរាមកំហែងក៏ដោយ តែឆន្ទៈវិជ្ជាជីវៈនៅតែរឹងមាំ។
ក្នុងឱកាសទិវាសេរីភាពសារព័ត៌មានពិភពលោក ៣ ឧសភា លោក មាស សុភ័ណ្ឌ បានប្រាប់ថា ទោះបីកម្ពុជាស្ថិតនៅក្នុងកាលៈទេសៈនៃវិបត្តិរីករាលដាលនៃជំងឺកូវីដ១៩ ក៏ប៉ុន្តែស្ថានភាពនិងបរិយាកាសនៃការអនុវត្តវិជ្ជាជីវៈសារព័ត៌មាននៅកម្ពុជានៅតែប្រព្រឹត្តទៅក្នុងស្ថានភាពល្អជាប្រក្រតី ដោយគ្មានការគំរាមកំហែង ការបំភិតបំភ័យ ការបំបិទសិទ្ធិសេរីភាព ក៏ដូចជាការបង្ខំទៅដល់អង្គភាពសារព័ត៌មានឬអ្នកសារព័ត៌មានណាមួយឡើយ។
លោក មាស សុភ័ណ្ឌ បន្តថា នៅក្នុងការងារអនុវត្តការងារប្រចាំថ្ងៃរបស់អ្នកសារព័ត៌មាន ក៏ដូចជាអ្នកប្រកបវិជ្ជាជីវៈសារព័ត៌មាន និងសោតទស្សន៍នៅកម្ពុជា គឺប្រព្រឹត្តទៅដោយប្រក្រតីភាព ទោះបីជាកម្ពុជាកំពុងស្ថិតនៅក្នុងបរិបទនៃការដាក់ចេញនៅសារាចរណែនាំ វិធានការចាំបាច់មួយចំនួនដើម្បីធ្វើយ៉ាងណាដើម្បីកាត់ផ្តាច់ នៃការរីករាលដាលជំងឺកូវីដ១៩ នៅក្នុងសហគមន៍ក៏ដោយ ក៏ការអនុវត្តវិជ្ជាជីវៈសារព័ត៌មាន ក៏ដូចជាការបំពេញការងាររបស់អ្នកសារព័ត៌មាននៅតែប្រព្រឹត្តទៅយ៉ាងរលូន និងជាប្រក្រតីភាព។
លោក មាស សុភ័ណ្ឌ បន្តទៀតថា ទន្ទឹមនឹងនោះ ដើម្បីធានាបាននៅការអនុវត្តការងាររបស់អ្នកសារព័ត៌មាន ក៏ដូចជាអ្នកប្រកបវិជ្ជាជីវៈសារព័ត៌មាននៅកម្ពុជា ក្រសួងព័ត៌មានក៏បានចេញនៅលិខិតបញ្ជាក់ក្នុងការធ្វើដំណើរនៅក្នុងតំបន់ដែលបិទខ្ទប់មួយចំនួននៅក្នុងការទប់ស្កាត់ការរីករាលដាលនៃជំងឺកូវីដ១៩នេះដើម្បីបង្កលក្ខណៈងាយស្រួលទៅដល់អ្នកសារព័ត៌មានដែលអាចចុះទៅបំពេញការងារ ក៏ដូចជាចុះទៅយកព័ត៌មាននៅតំបន់ទាំងនោះដោយរលូន។
លោក មាស សុភ័ណ្ឌ បានបញ្ជាក់ថា ចំពោះការអនុវត្តវិធានការដ្ឋបាល និងវិធានការផ្លូវច្បាប់មួយចំនួន ទៅលើអ្នកសារព័ត៌មានមួយចំនួនតូចនាពេលកន្លងមកនេះ ពុំមែនជាការបំបិទសិទ្ធិសេរីភាព ពុំមែនជាការគំរាមកំហែង ពុំមែនជាការដាក់គំនាបនយោបាយ ឬក៏ជាការរារាំងដល់សេរីភាពអ្នកសារព័ត៌មាននោះទេ ការអនុវត្តច្បាប់គឺអនុវត្តតែទៅលើអ្នកសារព័ត៌មានមួយចំនួនតូចដែលប្រព្រឹត្តខុសពីក្រមសីលធម៌វិជ្ជាជីវៈជាអ្នកសារព័ត៌មាន ក៏ដូចជាប្រព្រឹត្តខុសទៅនិងច្បាប់ និងលិខិតបទដ្ឋានគតិយុត្តិដែលមានជាធរមាននៅកម្ពុជានោះទេ។
ដូច្នេះការអនុវត្តវិធានការផ្លូវច្បាប់ទៅលើអ្នកសារព័ត៌មានគឺជាការទទួលខុសត្រូវរបស់អ្នកប្រព្រឹត្តខុស មិនថាអ្នកសារព័ត៍មានឬក៏បុគ្គលណាទេ ប្រសិនបើប្រព្រឹត្តខុសច្បាប់ គឺត្រូវទទួលខុសត្រូវចំពោះមុខច្បាប់ ដូច្នេះការអនុវត្តវិធនាការផ្លូវច្បាប់ទៅលើអ្នកសារព័ត៌មាន គឺវាមិនមែនជាការបិទសិទ្ធិសេរីភាព ការគំរាមកំហែង ការរារាំងដល់សេរីភាពរបស់អ្នកសារព័ត៌មានដូចដែលក្រុមអង្គការសង្គមស៊ីវិលមួយចំនួនតូចបានលើកឡើងនោះទេ៕
