កម្ពុជាលើកទឹកចិត្តអ្នកសារព័ត៌មានរាយការណ៍ពីគ្រោះថ្នាក់ចរាចរណ៍ឲ្យបានច្រើន
Cambodia News
ភ្នំពេញ៖ ក្នុងពិធីបើកសិក្ខាសាលាបណ្តុះបណ្តាលអ្នកសារព័ត៌មាន ស្តីពី សុវត្ថិភាពចរាចរណ៍ផ្លូវគោក នាព្រឹកថ្ងៃទី២៧ មីនា ២០១៣ នៅសណ្ឋាគារ សាន់វ៉េ ក្រុមមន្រ្តីជាតិ និងអន្តរជាតិ បានអំពាវនាវឱ្យបណ្តាអ្នកសារព័ត៌មាននៅក្នុងប្រទេសកម្ពុជា បន្តជួយផ្សព្វផ្សាយរបាយការណ៍ព័ត៌មានទាក់ទងនឹងសុវត្ថិភាពចរាចរណ៍ ផ្លូវគោក។
លោក ខៀវ កាញារីទ្ធ អ្នកនាំពាក្យរាជរដ្ឋាភិបាល និងជារដ្ឋមន្ត្រីក្រសួងព័ត៌មាន បានមានប្រសាសន៍ថា «ទោះបីជាអ្នកបង្កគ្រោះថ្នាក់ចរាចរណ៍ បានបង់លុយ សងសំណងដល់ជនរងគ្រោះ និងគ្រួសារជនរងគ្រោះក្តី ក៏ប៉ុន្តែអ្នកបង្កគ្រោះថ្នាក់ចរាចរណ៍នោះ គឺមិនអាចរួចខ្លួន ពោលគឺនៅតែត្រូវផ្តន្ទាទោសតាមច្បាប់។
លោក ខៀវ កាញារីទ្ធ បានបន្តថា « ការបង់លុយ សងជំងឺចិត្ត ជាការងារមួយផ្សេង ប៉ុន្តែកំហុសផ្នែកព្រហ្មទណ្ឌ នៅតែមាន ដូច្នេះអ្នកបើកបរ បើកបុកគេស្លាប់ វាអាចជាបទមនុស្សឃាតដោយចេតនា ឬដោយអចេតនា នេះជាការងារ ដែលនគរបាល ឬក៏ព្រះរាជអាជ្ញា ត្រូវធ្វើ ទោះជាគ្រួសារជនរងគ្រោះ មិនប្តឹងក៏ដោយ។
ទោះជាយ៉ាងនេះក្ដី លោក ខៀវ កាញារីទ្ធ បានធ្វើកត់ការសម្គាល់ថា កន្លងមកក៏មានការសរសេរអត្ថបទភាគច្រើននៃអត្ថបទសរសេរផ្សព្វផ្សាយ អំពីគ្រោះថ្នាក់ចរាចរណ៍ជាការបរិយាយទូទៅ និងកម្រមានជាការវិភាគស៊ីជំរៅឱ្យគ្រប់ជ្រុងជ្រោយណាស់។
នៅក្នុងវគ្គបណ្តុះបណ្តាល ដល់អ្នកកាសែត លោក ត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូន បានស្នើឱ្យអ្នកសារព័ត៌មានទាំងអស់ចូលរួមបង្កើនការសរសេរអត្ថបទប្រកប ដោយគុណភាព និងមានការវិភាគស៊ីជម្រៅអំពីសុវត្ថិភាពចរាចរណ៍។
លោកក៏បានស្នើផងដែរថា អត្ថបទទាំងនោះគួរតែមានប្រភពព័ត៌មានច្បាស់លាស់, ទំហំនៃគ្រោះថ្នាក់ចរាចរណ៍ ផលប៉ះពាល់សេដ្ឋកិច្ច សង្គម និងសុខភាពសាធារណៈផងដែរ ។ បើតាមលោករដ្ឋមន្រ្តីក្រសួងសាធារណការ នៅឆ្នាំ២០១១ គ្រោះថ្នាក់ចរាចរណ៍បានធ្វើឲ្យកម្ពុជា ខាតបង់សេដ្ឋកិច្ចជាតិរហូតដល់ទៅ ៣១០លានដុល្លារសហរដ្ឋអាម៉េរិក៕