ឧប្បទ្ទវហេតុបាក់ស្រុតស្ពានអាកាសនៅថៃបណ្តាលឲ្យពលករខ្មែរ៧នាក់របួស
សារព័ត៌មាន Cambodia News/
ថៃ (២៥ មករា ២០២១) ៖ កាលពីរសៀលថ្ងៃទី២៣ ខែមករា ឆ្នាំ២០២១ ពលករខ្មែរចំនួន៧នាក់ក្នុងចំណោមជនរងគ្រោះសរុប៩នាក់ ដែលបានរងរបួសយ៉ាងធ្ងន់ធ្ងរ បន្ទាប់ពីមានឧប្បទ្ទវហេតុបាក់ស្រុត ស្ពានអាកាស ដែលកំពុងស្ថាបនាក្នុងតំបន់ដែលកំពុងស្ថាបនាស្ថិតក្នុងឃុំគោកស៊ូង ស្រុកមឿង ខេត្តណាខនរ៉ាតសីមា ប្រទេសថៃ។
ប្រភពជាច្រើនបានបញ្ជាក់ថាការបាក់ស្រុតស្ពានអាកាសនេះគឺស្របពេលដែលកម្មករកំពុងចាក់បេតុងនៅខាងលើពុម្ពស្ពាន ដែលបណ្តាលឲ្យសង្កត់ និងប៉ះពាល់ដល់កម្មករដែលកំពុងបម្រើការងារនៅទីនោះសរុបចំនួន៩នាក់ ក្នុងនោះមានកម្មករខ្មែរ៧នាក់ កម្មករភូមា១នាក់ និងកម្មករថៃ១នាក់ដោយបានបញ្ជូនទៅកាន់មន្ទីរពេទ្យមហារ៉ាតណាខនរ៉ាតសីមា ដើម្បីសង្គ្រោះដោយពុំមានប៉ះពាល់ដល់អាយុជីវិតនរណាម្នាក់ឡើយ។
រដ្ឋមន្ត្រីក្រសួងសាធារណការ និងដឹកជញ្ជូនថៃ បានមានប្រសាសន៍ថា អ្នកម៉ៅការ និងគ្រប់គ្រងការងារនេះ ត្រូវយកចិត្តទុកដាក់អោយបានល្អប្រសើរលើការទទួលខុសត្រូវព្យាបាល និងឧបត្ថម្ភដល់កម្មករដែលរងរបួសពិសេស គឺកម្មករដែលមកពីប្រទេសកម្ពុជា និងភូមា៕
