ឪពុកដែលប្រើអំពើហិង្សាលើកូនស្រីដូចសត្វតិរច្ឆាននៅក្រុងបាវិតត្រូវសមត្ថកិច្ចឃាត់ខ្លួនហើយ
សារព័ត៌មាន Cambodia News/
ស្វាយរៀង (២១ កញ្ញា ២០២០) ៖ ឪពុកដែលប្រើអំពើហិង្សាលើកូនស្រីដូចសត្វតិរច្ឆាន នៅសង្កាត់ច្រកម្ទេស ក្រុងបាវិត ខេត្តស្វាយរៀង ត្រូវបានសមត្ថកិច្ចឃាត់ខ្លួនហើយ នៅព្រឹកថ្ងៃទី២១ ខែកញ្ញា ឆ្នាំ២០២០នេះ នៅចំណុចរោងចក្រស៊ីកូ ក្នុងតំបន់សេដ្ឋកិច្ចពិសេសមេនហាធែន។ ពេលនេះ សមត្ថកិច្ចកំពុងបញ្ជូនជនសង្ស័យទៅអធិការដ្ឋាន នគរបាលក្រុងបាវិត ដើម្បីធ្វើការសាកសួរ។
បើយោងតាម លោកវរសេនីយ៍ទោ អែម សុវណ្ណារិទ្ធ អធិការនគរបាលក្រុងបាវិត បានប្រាប់ឲ្យដឹង នៅព្រឹកថ្ងៃទី ២១ ខែកញ្ញាថាករណីហិង្សានេះ បានកើតឡើង កាលពីសប្តាហ៍មុន ហើយគ្រួសារជនរងគ្រោះ ក៏មិនបានដាក់ពាក្យប្ដឹង មកប៉ុស្តិ៍រដ្ឋបាល សង្កាត់ច្រកម្ទេសដែរ ដូច្នេះសមត្ថកិច្ចយើងពុំបានដឹង នូវព័ត៌មាននេះទេ។
លោកអធិការ បន្តថា តែដោយមានការបង្ហោះ តាមហ្វេសប៊ុក ថា មានករណីអំពើហិង្សាឪពុកវាយកូន នៅសង្កាត់ច្រកម្ទេស ក្រុងបាវិត ទើបលោកបញ្ជាឲ្យកម្លាំង ចុះស្រាវជ្រាវ រហូតមកដល់ព្រឹកថ្ងៃទី២១កញ្ញានេះ កម្លាំងយើងបាននាំខ្លួនជនសង្ស័យ និងកសាងសំណុំរឿងបញ្ជូនទៅស្នងការនគរបាលខេត្ត ដើម្បីចាត់តាមនីតិវិធីច្បាប់។
លោកអធិការ ក៏បានបញ្ជាក់ថា ជនសង្ស័យជាឪពុក តែងតែបង្កបញ្ហានៅក្នុងគ្រួសារ ហើយសមត្ថកិច្ចក៏ធ្លាប់បានហៅមកអប់រំ ដើម្បីកុំឲ្យបង្ករហឹង្សា នៅក្នុងគ្រួសារបន្តទៀតដែរ ។ តែជនសង្ស័យ មិនកែខ្លួននៅតែបោក របស់របរក្នុងផ្ទះ ប្រពន្ធរបស់ជននេះទ្រាំលែង បានក៏រត់ទៅភ្នំពញ ចោលបន្សល់ទុកកូនស្រី ៣នាក់នៅក្នុងបន្ទុកគ្រួសារ ហើយសង្ស័យបានប្រើអំពើហិង្សា ទៅលើកូនស្រីរបស់ខ្លួន គ្រាន់តែខឹងកូនលេងទូរសព្ទ័យប់៕ សោយ៖ សហការី
