រុស្ស៊ីក្លាយជាប្រទេសទី១ ដែលអនុម័តប្រើវ៉ាក់សាំងប្រឆាំងកូវីដ១៩
សារព័ត៌មាន Cambodia News/
រុស្ស៊ី (១២ សីហា ២០២០) ៖ រុស្ស៊ីបានក្លាយជាប្រទេសដំបូងគេនៅក្នុងលោកដែលអនុញ្ញាតឲ្យប្រើប្រាស់វ៉ាក់សាំងប្រឆាំងកូវីដ១៩មួយ បន្ទាប់ពីការសាកល្បងលើមនុស្សមិនដល់២ខែផង ។
ការអនុម័តឲ្យប្រើជាផ្លូវការនេះបើកផ្លូវសម្រាប់ផលិតនិងចាក់វ៉ាក់សាំងទ្រង់ទ្រាយធំលើពលរដ្ឋរុស្ស៊ី ទោះជាថ្នាំនេះកំពុងនៅក្នុងដំណាក់កាលសាកល្បងចុងក្រោយដើម្បីឲ្យដឹងអំពីសុវត្ថិភាពនិងប្រសិទ្ធភាពរបស់វាក្តី។
ល្បឿនដែលរុស្ស៊ីបញ្ចេញវ៉ាក់សាំងរបស់ខ្លួន រំលេចអំពីការតាំងចិត្តរបស់ប្រទេសនេះដើម្បីឈ្នះការប្រឡងប្រណាំងរបស់ពិភពលោកសម្រាប់វ៉ាក់សាំងទប់ទល់នឹងជំងឺឆ្លងសកល តែវាក៏បង្កការព្រួយបារម្ភថា ប្រទេសនេះដាក់មោទនភាពជាតិនៅពីមុខវិទ្យាសាស្ត្រត្រឹមត្រូវនិងសុវត្ថិភាពមនុស្ស។
និយាយនៅជំនួបរដ្ឋាភិបាលមួយ លោកពូទីន បាននិយាយថា វ៉ាក់សាំងផលិតឡើងដោយវិទ្យាស្ថានGamaleya Instituteរបស់ក្រុងមូស្គូ មានសុវត្ថិភាព និងថាវាថែមទាំងចាក់សាកល្បងលើកូនស្រីម្នាក់របស់លោកថែមទៀត។
លោកបាននិយាយអួតថា «ខ្ញុំដឹងថាវាមានប្រសិទ្ធភាពណាស់ វាបង្កើតភាពស៊ាំរឹងមាំ និងខ្ញុំសូមនិយាយម្តងទៀតថា វ៉ាក់សាំងនេះបានឆ្លងកាត់ការត្រួតពិនិត្យសព្វគ្រប់អស់ហើយ។រំពឹងថាប្រទេសរុស្ស៊ីនឹងចាប់ផ្តើមផលិតវ៉ាក់សាំងនឹងទ្រង់ទ្រាយធំក្នុងពេលឆាប់ៗ»៕
