ព្រះមហាក្សត្រ យាងសួរសុខទុក្ខ និងប្រទាន ព្រះរាជអំណោយដល់ប្រជាកសិករក្រីក្រចំនួន ៤៤០គ្រួសារ នៅខេត្តកំពង់ឆ្នាំង
សារព័ត៌មាន Cambodia News/
ខេត្តកំពង់ឆ្នាំង៖ នាព្រឹកថ្ងៃទី១០ ខែឧសភា ឆ្នាំ២០២៣ ព្រះករុណា ព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានយាងចុះសួរសុខទុក្ខ និងបន្ទូលសំណេះសំណាល ជាមួយប្រជានុរាស្ត្ររបស់ព្រះអង្គ និងបានប្រោសប្រទាននូវព្រះរាជអំណោយដល់ប្រជាកសិករនៅភូមិស្រះកែវឃុំមេលំ ស្រុកបរិបូណ៌ ខេត្តកំពង់ឆ្នាំង ចំនួន៤៤០គ្រួសារ។
ព្រះរាជអំណោយ ដែលព្រះមហាក្សត្រព្រះប្រទានដល់ប្រជានុរាស្ត្ររបស់ព្រះអង្គទាំង៤៤០គ្រួសារខាងលើនេះ ក្នុងមួយគ្រួសារទទួលបានអង្ករចំនួន១បាវស្មើនឹង ៥០ គីឡូក្រាម ឃីត១កញ្ចប់ មុង១, ភួយ១, ក្រម៉ា១, សារ៉ុង១, មីចំនួន២កេស, ត្រីខ១យួរ ស្មើនឹង១០កំប៉ុង, ទឹកស៊ីអ៊ីវចំនួន ១យួរស្មើនឹង៦ដប, កន្ទេលចំនួន១ ទំហំ១.៧៥មគុណនិង ១.៨០ម, ស្បែកជើងផ្ទាត់ចំនួន១គូ និងថវិកាចំនួន២០ម៉ឺនរៀល។ នាឱកាសដ៏ថ្លៃថ្លាខាងលើនេះផងដែរ ព្រះមហាក្សត្រ ក៏បានសពព្រះរាជហឫទ័យ ប្រទានអាហារដល់កុមារាកុមារីជាច្រើនរយនាក់។
ព្រះអង្គ បានសពព្រះរាជហឫទ័យយាងសួរសុខទុក្ខដល់កុមារាកុមារី ដែលកំពុងទទួលទានអាហារដែលព្រះអង្គប្រទានរួចមក ព្រះអង្គក៏បានយាងសួរសុខទុក្ខដល់ប្រជានុរាស្ត្ររបស់ព្រះអង្គ តាមលំនៅដ្ឋានមួយចំនួនក្នុងភូមិស្រះកែវ ឃុំមេលំ ស្រុកបរិបូណ៌ ខាងលើនេះផងដែរ៕
