បុរសម្នាក់ត្រូវជនដៃដល់កាប់សម្លាប់ សមត្ថកិច្ចដាក់ការសង្ស័យទៅលើម្តាយបង្កើត និងប្រពន្ធ
សារព័ត៌មាន Cambodia News/
ភ្នំពេញ (២៤ កុម្ភៈ ២០២០) ៖ បុរសម្នាក់ត្រូវ បានជនដៃដល់ដែល សមត្ថកិច្ចជំនាញ បានដាក់ការសង្ស័យទៅលើម្តាយបង្កើត និងប្រពន្ធជាអ្នកកាប់សម្លាប់ស្លាប់ នៅវេលាម៉ោង២រសៀល ថ្ងៃទី២៣ ខែកុម្ភៈ ឆ្នាំ២០២០ នៅក្នុងផ្ទះលក់ចាប់ហ៊ួយមួយកន្លែង ស្ថិតនៅក្រុម២ ភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ។
សមត្ថកិច្ចបានឲ្យដឹងថា សពជនរងគ្រោះមានឈ្មោះ កង សុខុម អាយុ ៣២ឆ្នាំ មុខរបរ រត់ម៉ូតូកង់៣ ស្នាក់នៅចំណុចកើតហេតុខាងលើ ឯមានប្រពន្ធឈ្មោះ ភឿក អាយុ ២២ឆ្នាំ មុខរបរ លក់ចាប់ហ៊ួយ ចំណែកម្តាយបង្កើតមានឈ្មោះ ហាស់ សុភាព អាយុ ៥៩ឆ្នាំ ស្នាក់នៅជាមួយគ្នា ។
ប្រភពព័ត៌មានពីអ្នកជិតខាងបានឲ្យដឹងថា នៅថ្ងៃកើតហេតុ ប្រពន្ធ និងម្តាយបង្កើត បានឈ្លោះប្រកែកគ្នាជាមួយជនរងគ្រោះលុះមួយសន្ទុះក្រោយមក ម្តាយបង្កើតព្រមទាំងប្រពន្ធជនរងគ្រោះ បានយកសោផ្ទះផ្ញើអ្នកជិតខាង ហើយផ្តាំថា ទុកសោឲ្យឈ្មោះកង សុវណ្ណរ៉ា ដែលត្រូវជាឪពុកបង្កើតរបស់ជនរងគ្រោះផង និងផ្តាំថា ឲ្យឪពុកវាជួយធ្វើបុណ្យឲ្យវាផង វាស្លាប់ហើយ។
ដោយអ្នកជិតខាងមានការសង្ស័យ ក៏ចូលទៅអើតមើល ស្រាប់តែឃើញឈ្មោះ កង សុខុម ដេកស្លាប់ក្នុងថ្លុកឈាមបាត់ទៅហើយ ក៏បានរាយការណ៍ជូនសមត្ថកិច្ចមូលដ្ឋាន ប៉ុស្តិ៍នគរបាលរដ្ឋបាលស្ទឹងមានជ័យទី៣ ចុះមកពិនិត្យ និងធ្វើកោសល្យវិច័យទៅលើសពជនរងគ្រោះ ហើយ សមត្ថកិច្ចជំនាញបញ្ជាក់ថា សពបុរសខាងលើពិតជាត្រូវបានឃាតករកាប់សម្លាប់ ពិតប្រាកដមែន ។
សមត្ថកិច្ចជំនាញ បានដាក់ការសង្ស័យទៅលើម្តាយបង្កើត និងប្រពន្ធជនរងគ្រោះ ជាអ្នកកាប់សម្លាប់ ខណៈពួកគេទាំង២នាក់រត់គេចខ្លួនបាត់ហើយ។ បច្ចុប្បន្ន សមត្ថកិច្ចជំនាញព្រហ្មទណ្ឌខណ្ឌមានជ័យ និងកម្លាំងអាវុធហត្ថខណ្ឌមានជ័យ កំពុងតែបើកការស្រាវជ្រាវវែកមុខចាប់ឃាតក ដើម្បីយកមកផ្តន្ទាទោសតាមផ្លូវច្បាប់ ៕
