សម្តេចតេជោ ៖ រឿងអំពើក្បត់ជាតិ «មិនមែនបញ្ចប់ត្រឹមចាប់ខ្លួន» លោក កឹម សុខាទេ
សារព័ត៌មាន Cambodia News/
ភ្នំពេញ (០២ តុលា ២០១៧) ៖ នៅក្នុងពិធីសម្ពោធបើកដំណើរការជាផ្លូវការនៃសណ្ឋាគារ និងរមណីយដ្ឋានសុខាសៀមរាប នៅខេត្តសៀមរាប ថ្ងៃទី២ តុលានេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា សំណុំរឿងក្បត់ជាតិរបស់មេដឹកនាំបក្សប្រឆាំងមិនមែនបញ្ចប់ត្រឹមតែការចាប់ខ្លួនលោក កឹម សុខា ប្រធានគណបក្សសង្គ្រោះជាតិឡើយ ។
សម្តេចបានមានប្រសាសន៍បន្តថា សន្តិភាពនាំឲ្យមានការអភិវឌ្ឍន៍លើគ្រប់វិស័យ ជាពិសេសវិស័យទេសចរណ៍ដែលទទួលបានភ្ញៀវអន្តរជាតិជាង ៥ លាននាក់ក្នុងឆ្នាំកន្លងមក ហើយកម្ពុជាកំពុងតែព្យាយាមទាក់ទាញភ្ញៀវទេសចរណ៍មកទស្សនាកម្ពុជាឲ្យបាន ៧ លាននាក់សម្រាប់ឆ្នាំ២០២០ ។ ដូច្នេះរាជរដ្ឋាភិបាលមិនអនុញ្ញាតិ និងផ្តល់ឱកាសឲ្យអ្នកណាមកបំផ្លាញសន្តិភាពរបស់កម្ពុជាដែលកំពុងមានក្នុងដៃនោះទេ ។
សម្តេចតេជោ បញ្ជាក់ថា៖ «មិនមែនបញ្ចប់ត្រឹមចាប់ខ្លួនមនុស្សម្នាក់ទេ សូមផ្តាំឲ្យហើយ ព្រោះនេះជាការរៀបចំជាលក្ខណៈប្រព័ន្ធរៀបចំសកម្មភាពជាប្រព័ន្ធ យើងមិនអនុញ្ញាតិឲ្យអ្នកឯងបន្តអំពើក្បត់ និងបំផ្លាញសន្តិសុខជាតិទេ”»។ សម្តេចតេជោ ហ៊ុន សែន បានបន្តថា សម្តេចមិនអនុញ្ញាតិឱ្យជនណាម្នាក់ធ្វើជាខ្ញុំបម្រើបរទេសមកបំផ្លាញខ្មែរទេ យើងហ៊ានធ្វើ យើងហ៊ានប្រឈមគ្រប់បញ្ហា ៕
