លោក សេង ឡុង ភ្នាក់ងារព័ត៌មាន Fresh News ប្រចាំខេត្តកណ្តាល បានស្លាប់ដោយសារគ្រោះថ្នាក់ចរាចរណ៍
សារព័ត៌មាន Cambodia News/
កណ្តាល (២១ សីហា ២០១៩) ៖ លោក សេង ឡុង ភ្នាក់ងារអង្គភាពព័ត៌មាន Fresh News ប្រចាំខេត្តកណ្តាល បានស្លាប់ភ្លាមៗ គួរឲ្យរន្ធត់បំផុត នៅក្នុងឧបទ្ទវហេតុគ្រោះថ្នាក់ចរាចរណ៍ បើករថយន្ត LEXUS RX300 ទៅបុករបាំងថ្មពុះចែកទ្រូងផ្លូវ ចំពាក់កណ្តាល នៅវេលាម៉ោង៩:៤០នាទីយប់ ថ្ងៃទី២០ ខែសីហា លើផ្លូវជាតិលេខ២១ នៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល។
ជនរងគ្រោះឈ្មោះ សេង ឡុង ភេទប្រុស អាយុ៤៦ឆ្នាំ រស់នៅភូមិក្បាលជ្រោយ ឃុំព្រែកគយ ស្រុកស្អាង ខេត្តកណ្ដាល ។ សាក្សីបានឲ្យដឹងថា នៅមុនពេលកើតហេតុ មានរថយន្តមួយគ្រឿង បានបើកក្នុងទិសដៅពីជើងទៅត្បូងក្នុងល្បឿនលឿន លុះមកដល់ចំណុចកើតហេតុ ក៏បានបុកក្បាលរបាំងចែកផ្លូវតែម្ដង ។
ក្រោយពេលកើតហេតុ នគរបាលចរាចរណ៍ក្រុងតាខ្មៅ បានចុះមកធ្វើការវាស់វែងនិងស្ទូចយករថយន្តទៅរក្សាទុកបណ្ដោះអាសន្ននៅអធិការដ្ឋាននគរបាលក្រុងតាខ្មៅ ដើម្បីរង់ចាំធ្វើការដោះស្រាយតាមផ្លូវច្បាប់ ។ ចំណែកសពជនរងគ្រោះ ត្រូវបានសមត្ថកិច្ចធ្វើកំណត់ហេតុ រួចប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕
