ព្រះរាជពិធីច្រត់ព្រះនង្គ័លៈដំណាំកសិកម្មបីមុខនឹងទទួលបានផលល្អ
សារព័ត៌មាន Cambodia News/
ភ្នំពេញ (២២ ឧសភា ២០១៩) ៖ ព្រះរាជពិធីច្រត់ព្រះនង្គ័ល ត្រូវបានប្រារព្ធឡើងជារៀងរាល់ឆ្នាំ នៅថ្ងៃ៤រោច ខែពិសាខ ដើម្បីប្រកាសថា រដូវវស្សា បង្កបង្កើនផល ចាប់ផ្តើមហើយ ដោយនៅឆ្នាំនេះ បានប្រារព្ធឡើងនៅខេត្តតាកែវ នាព្រឹកថ្ងៃទី២២ ខែឧសភា ក្រោមព្រះរាជាធិបតីភាពដ៏ខ្ពង់ខ្ពស់របស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។
ព្រះរាជពិធីប្រចាំឆ្នាំនេះ ក៏ជាការផ្សងប្រផ្នូល អំពីផលដំណាំកសិកម្ម នៅក្នុងរយៈពេលពេញមួយឆ្នាំ តាមរយៈការបរិភោគអាហារ ៧មុខ របស់គោឧសភរាជ ឬគោបារបស់ព្រះមហាក្សត្រមួយនឹម។ អាហារ ៧មុខ រួមមាន៖ ស្មៅ ស្រូវ ពោត សណ្តែក ល្ង ទឹក និងស្រា។
ក្រោយពីបានលែងគោឧសភរាជឲ្យបរិភោគអាហារ៧មុខ ដែលដាក់លើជើងពាននៅកណ្តាលវាលព្រះស្រែមានដូចជាស្រូវ ល្ង ពោត សណ្តែក ទឹក និងស្រាសនោះ ក្រុមព្រហ្មព្រះរាជគ្រូបានឲ្យដឹងថា ឆ្នាំនេះផលដំណាំរបស់ប្រជាកសិករនឹងមានភាពល្អប្រសើរចំនួន៣មុខ គឺស្រូវ សណ្តែក ពោត ។ចំណែកអាហារ៤មុខទៀត ដូចជា ល្ង ស្មៅ ទឹក និងស្រា គោឧសភរាជពុំបានបរិភោគឡើយ។ក្នុងនោះបរិភោគស្រូវបាន៨៥ភាគរយ ពោត ៩០ភាគរយ និងសណ្តែកបាន៨០ភាគរយ៕
