សមត្ថកិច្ចធ្វើការឃាត់ខ្លួននារីវ័យក្មេង២នាក់ពីបទប្រើប្រើប្រាស់ថ្នាំញៀន និងអាវុធខុសច្បាប់
ភ្នំពេញ ៖ កាលពិវេលាម៉ោង ១៥ និង០០នាទីថ្ងៃទី ២១ ខែវិច្ឆិកា ឆ្នាំ២០១២ នៅចំណុច ផ្លូវលំមុខ មណ្ឌល អប់រំ កែប្រែទី ២ នៅភូមិកំរៀង សង្កាត់ព្រៃវែង ខណ្ឌដង្កោជនសង្ស័យជានារីពីរនាក់ ត្រូវបានកម្លាំងនគរបាល នៃអធិការដ្ឋាន នគរបាល ខណ្ឌដង្កោ ធ្វើការឃាត់ខ្លួនបន្ទាប់ពីមានសេចក្តីរាយការណ៍មកថា នារីពីរនាក់ខាងលើនេះមានថ្នាំញៀន និងអាវុធខ្លីខុសច្បាប់នូវជាប់និងខ្លួនរបស់ពួកគេ ភ្លាមៗ នោះសមត្ថកិច្ច នគរបាលខណ្ឌដង្កោ បានស្ទាក់ចាប់ឃាត់ខ្លួនបានភ្លាមៗ។
សមត្ថកិច្ចនគរបាល បានឲ្យដឹងថា ជនសង្ស័យទាំងពីរនាក់ មានទី ១ ឈ្មោះ ឱម រិទ្ធិចាន់ ភេទស្រី អាយុ ១៥ ឆ្នាំ ជនជាតិខ្មែរ មុខរបរ សិស្សថ្នាក់ទី ១១ នៃវិទ្យាល័យ ព្រះស៊ីសុវត្ថិ ស្នាក់នៅក្នុងផ្សារដើមគរ សង្កាត់ផ្សារដើមគរ ខណ្ឌទួលគោក ទី ២ ឈ្មោះ ស៊ិន ដាវិន ភេទស្រី អាយុ ១៦ ឆ្នាំ ជនជាតិខ្មែរ មុខរបរ សិស្សថ្នាក់ទី ១១ នៅវិទ្យាល័យ ព្រះស៊ីសុវត្ថិ ស្នាក់នៅផ្ទះលេខ ៦១ ផ្លូវលេខ ១៧៨ សង្កាត់ជ័យជំនះ ខណ្ឌដូនពេញ ។
បន្ទាប់ពីសមត្ថកិច្ច ធ្វើការសាកសួរព័ត៌មាន ជនសង្ស័យ រួចមកនគរបាលព្រហ្មទណ្ឌ នៃអធិការដ្ឋាន ខណ្ឌដង្កោ ធ្វើការបញ្ជូនជនសង្ស័យនិងវត្ថុតាង ប្រគល់ទៅឲ្យការិយាល័យ នគរបាលប្រឆាំងបទល្មើស គ្រឿងញៀន រាជធានីភ្នំពេញ ចាត់ការបន្តតាមផ្លូវច្បាប់៕
ដោយ៖ ហេង នាង
