រដ្ឋាភិបាលកម្ពុជា បានសម្រេចលុបបំបាត់ថ្ងៃឈប់សម្រាកចំនួន៧ថ្ងៃ
សារព័ត៌មាន Cambodia News/
ភ្នំពេញ (២៩ មីនា ២០១៩) ៖ នៅក្នុងវេទិការាជរដ្ឋាភិបាល-ផ្នែកឯកជន លើកទី១៨ នៅវិមានសន្តិភាព នៅព្រឹកថ្ងៃទី២៩ ខែមីនា នេះ សម្តេចនាយករដ្ឋមន្រ្តី ហ៊ុន សែន បានប្រកាសថា រដ្ឋាភិបាល បានសម្រេចលុបបំបាត់ថ្ងៃឈប់សម្រាកចំនួន៧ថ្ងៃចោល ដោយការលុបបំបាត់នេះ នឹងត្រូវអនវុត្តចាប់ពីឆ្នាំ២០២០ទៅ។
ប្រមុខរដ្ឋាភិបាលកម្ពុជា ពុំបានបញ្ជាក់ទេថា ៧ថ្ងៃនោះ នឹងត្រូវកាត់បន្ថយថ្ងៃណាខ្លះ។ ប៉ុន្តែ ប្រមុខរដ្ឋាភិបាល បង្ហើបថា ថ្ងៃចម្រើនព្រះជន្មព្រះមហាក្សត្រ ដែលធ្លាប់ឈប់សម្រាក៣ថ្ងៃ នឹងត្រូវកាត់បន្ថយឲ្យនៅសល់តែ១ថ្ងៃប៉ុណ្ណោះ ឯ២ថ្ងៃទៀត នឹងត្រូវលុបចោល។
សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានលើកឡើងថា ក្នុងមួយឆ្នាំ កម្ពុជា មានថ្ងៃឈប់សម្រាកពី២៨ទៅ៣០ថ្ងៃ ដោយការឈប់សម្រាកនេះប្រមុខរដ្ឋាភិបាល យល់ថា គឺច្រើនជាងបណ្តាប្រទេសដទៃ ដូច្នេះត្រូវកាត់បន្ថយខ្លះ ដើម្បីលើកកម្ពស់ផលិតភាពការងារ៕ ដោយ ៖ ហេង នាង
