ក្រសួងព័ត៌មានគ្រោងបង្កើតទូរទស្សន៍៣ ឬ៤ប៉ុស្ដិ៍បន្ថែមទៀត សម្រាប់ប្រព័ន្ធផ្សព្វផ្សាយរបស់ជាតិ
សារព័ត៌មាន Cambodia News/
រាជធានីភ្នំពេញ (០៣ មករា ២០១៩) ៖ ក្នុងបទសម្ភាសន៍ជាមួយទីភ្នាក់ងារសារព័ត៌មានកម្ពុជា AKP និងវិទ្យុជាតិកម្ពុជា កាលពីព្រឹកថ្ងៃទី០២ខែមករា ឆ្នាំ២០១៩ នៅទីស្តីការក្រសួងព័ត៌មាន រដ្ឋមន្ត្រីក្រសួងព័ត៌មាន ឯកឧត្តម ខៀវ កាញារីទ្ធបានបញ្ជាក់ឱ្យដឹងថា ក្រសួងព័ត៌មានគ្រោងនឹងបង្កើតទូរទស្សន៍៣ ឬ៤ប៉ុស្ដិ៍ថែមទៀត ដើម្បីផ្សព្វផ្សាយឱ្យបានទូលំទូលាយសម្រាប់ប្រព័ន្ធផ្សព្វផ្សាយព័ត៌មានរបស់ជាតិបន្ថែមលើការផ្សាយតាមគេហទំព័រ និងការផ្សាយជាសម្លេង។
ឯកឧត្តម ខៀវ កាញារីទ្ធ បានបញ្ជាក់ថា ទូរទស្សន៍ដែលគ្រោងនឹងបង្កើតបន្ថែមនោះ គឺសម្រាប់ទីភ្នាក់ងារសារព័ត៌មានកម្ពុជា AKP និងវិទ្យុជាតិកម្ពុជា ខណៈបច្ចុប្បន្នស្ថាប័នទាំងពីរ មានតែការផ្សព្វផ្សាយតាមវិបសាយ និងរលកធាតុអាកាសជាសំឡេងតែប៉ុណ្ណោះ។
ឯកឧត្តមរដ្ឋមន្រ្ដី បានលើកឡើងថា សម្រាប់ការងារជាអាទិភាពបច្ចុប្បន្ន ស្ថាប័នជាតិទាំងពីរត្រូវបណ្តុះ បណ្តាលមន្ត្រី ឱ្យមានសមត្ថភាពខាងជំនាញគ្រប់គ្រងបច្ចេកទេស អ្នកសរសេរវិចារណកថា បទអត្ថាធិប្បាយ និងអ្នកវិភាគព័ត៌មានស៊ីជម្រៅជាមុនសិន ដើម្បីធ្វើឱ្យទស្សនិកជន និងប្រិយមិត្តងាកមកគាំទ្រស្តាប់ និងទស្សនាបណ្តាញផ្សព្វផ្សាយព័ត៌មានរបស់ជាតិឱ្យកាន់តែច្រើន និងមានការប្រកួតប្រជែងខ្ពស់៕
