ស្គាល់គ្នាតាមហ្វេសប៊ុកណាត់គ្នាមកដេកផ្ទះសំណាក់ ត្រូវខាងប្រុសភ្ជង់ប្លន់យកអស់ពីខ្លួន
សារព័ត៌មាន Cambodia News/
ភ្នំពេញ (២ មករា ២០១៩) ៖ ជនសង្ស័យម្នាក់បានស្គាល់នារីស្រស់ស្អាតម្នាក់តាមហ្វេសប៊ុកឆាតចុះឆាតឡើងលួងលោមជនរងគ្រោះ ណាត់គ្នានៅផ្ទះសំណាក់បៃតងស្រាប់តែនារីរងគ្រោះមកដល់បើកទ្វារចូលស្រាប់ជនសង្ស័យច្របាច់ក រួចដកកាំផ្ជង់ ប្លន់យកគ្រឿងអលង្ការទូរសព្ទ័ និងលុយមួយចំនួនសរុបជាទឹកប្រាក់អស់ជាង៣ពាន់ដុល្លាររួចគេចខ្លួនបាត់។
ហេតុការណ៍នេះកើតឡើងនៅវេលាម៉ោង៦ល្ងាច ថ្ងៃទី១ ខែមករា ឆ្នាំ២០១៩ តាមបណ្តោយផ្លូវបេតុង ក្នុង ផ្ទះសំណាក់បៃតង ស្ថិតនៅភូមិអ័រគីដេ សង្កាត់អូបែកក្អម ខណ្ឌសែនសុខ រាជធានីភ្នំពេញ។
តាមសម្តីសមត្ថកិច្ចបានឲ្យថា នារីរងគ្រោះឈ្មោះ ហួន សុភា ភេទស្រី អាយុ២៤ឆ្នាំ មុខរបរលក់ឥវ៉ាន់ online ស្នាក់នៅ ផ្ទះជួល សង្កាត់កាកាបទី១ ខណ្ឌពោធិ៍សែនជ័យ ចំណែកជនសង្ស័យ ភេទប្រុស មិនស្គាល់អត្តសញ្ញាណ។
ក្រោយកើតហេតុជនរងគ្រោះត្រូវបានកម្លាំងកងរាជអាវុត្ថខណ្ឌសែនសុខ នាំខ្លួននិងដាក់ពាក្យបណ្ដឹងនិងសួរនាំបន្ត ដើម្បីឈានទៅកំណត់មុខសញ្ញាជនសង្ស័យនិងចាប់ខ្លួនមកផ្តន្ទាទោសទៅតាមផ្លូវច្បាប់៕
