គ្រឿងសព្វាវុធគីមី ត្រូវបានដឹកចេញពីប្រទេសស៊ីរីជាលើកដំបូង
គ្រឿងសព្វាវុធដែលប្រើសារធាតុគីមីជា ច្រើនត្រូវបានគេដឹកចេញជាលើកដំបូងពីប្រទេសស៊ីរី នៅថ្ងៃអង្គារទី៧មករា។ គ្រឿងសព្វាវុធគីមីទាំងនោះត្រូវបានគេដឹកតាមនាវាមួយគ្រឿង ដើម្បីយកទៅកម្ទេចចោលស្របតាមកិច្ចព្រមព្រៀងស្តីពីការបំផ្លាញ អាវុធគីមីនៅក្នុងប្រទេសស៊ីរី។ បេសកកម្មដឹកអាវុធគីមីទាំងអស់ចេញពីប្រទេសស៊ីរីត្រូវគេគ្រោងបញ្ចប់ នៅមុនថ្ងៃទី ៣១មករានេះ។
កប៉ាល់ មួយគ្រឿងបានដឹកគ្រឿងសព្វាវុធគីមីចាកចេញពីកំពង់ផែ ប្រទេសស៊ីរីហើយ កាលពីថ្ងៃអង្គារទី៧មករា ឆ្ពោះទៅកាន់ដែនសមុទ្រ អន្តរជាតិ។ គឺជាកប៉ាល់របស់ប្រទេសដាណឺម៉ាកដែលដឹកគ្រឿងសាស្ត្រាវុធដ៏ គ្រោះថ្នាក់គ្រប់ប្រភេទជាលើកដំបូង ចេញពីប្រទេសស៊ីរី។ គ្រឿងសព្វាវុធគីមីទាំងនោះ ត្រូវបានគេដកហូតចេញពីមជ្ឈមណ្ឌលពីរ កន្លែងនៅក្នុងប្រទេសនេះ។ នេះបើយោងតាមសេចក្តីប្រកាសព័ត៌មានរបស់បេសកកម្មរួមរវាង អង្គការសហ ប្រជាជាតិនិងអង្គការហាមឃាត់អាវុធគីមី (OIAC)។
កប៉ាល់ ដឹកគ្រឿងសព្វាវុធគីមីនេះត្រូវបានហែហមដោយនាវា៤គ្រឿងរបស់ ន័រវេសនិងដាណឺម៉ាក។ នាវាពីរគ្រឿងទៀតរបស់ចិននិងរុស្ស៊ី ក៏ត្រូវចូលរួមអមដំណើរកប៉ាល់ ដឹកជញ្ជូនអាវុធគីមីនេះដែរនៅពេលដែលកប៉ាល់ចាកចេញពីកំពង់ផែ។
សូមបញ្ជាក់ថា យោងតាមកិច្ចព្រមព្រៀងស្តីពីផែនការបំផ្លាញអាវុធគីមីនៅក្នុងប្រទេស ស៊ីរីដែលអនុម័តដោយក្រុមប្រឹក្សាសន្តិសុខសហប្រជាជាតិ គ្រឿងសព្វាវុធគីមីទាំងអស់នឹងត្រូវប្រមូលផ្តុំនៅឯកំពង់ផែមួយឈ្មោះ Lattaquié នៃប្រទេសស៊ីរីមុននឹងដឹកចេញទៅកាន់ប្រទេសអ៊ីតាលី។ នៅទីនោះហើយដែលគ្រឿងសព្វាវុធគីមីទាំងនោះនឹងត្រូវគេផ្ទេរទៅឲ្យ នាវាអាមេរិកាំងមួយដែលមានសមត្ថភាពអាចបំផ្លាញសារធាតុគីមីទាំងនោះ នៅក្នុងសមុទ្រតែម្តង។
ការដឹកជញ្ជូនអាវុធគីមីដ៏គ្រោះថ្នាក់ទាំងអស់ចេញពីប្រទេសស៊ីរីគ្រោង នឹងបញ្ចប់នៅមុនថ្ងៃទី៣១មករានេះ ប៉ុន្តែ បញ្ហាសន្តិសុខ និងអាកាសធាតុក្នុងរយៈពេលប៉ុន្មានសប្តាហ៍នេះបានរំខានដល់ ការដឹកជញ្ជូនអាវុធគីមីទាំងនោះមកកាន់កំពង់ផែ។ បញ្ហានេះបានធ្វើឲ្យបេសកកម្មនេះត្រូវពន្យារពេលបន្តទៀត។ ប៉ុន្តែ រហូតមកដល់ពេលនេះនៅមិនទាន់មានការកំណត់កាលបរិច្ឆេទថ្មីអំពីការបញ្ចប់ បេសកកម្មដឹកសព្វាវុធគីមីចេញពីប្រទេសស៊ីរីនៅឡើយទេ៕ដោយ ប៉ែន បូណា (RFI)