យន្តហោះចំនួន ៩ នឹងដាក់បង្ហាញក្នុងពិព័រណ៍យន្តហោះ និងបច្ចេកវិទ្យា
សារព័ត៌មាន Cambodia News/
ភ្នំពេញ (១៣ ធ្នូ ២០១៨) ៖ យន្តហោះចំនួន ៩ ដែលរួមមាន ទាំង ឧទ្ធម្ភាគចក្រ និងយន្តហោះឯកជន នឹងត្រូវដាក់បង្ហាញក្នុងពិព័រណ៍ យន្តហោះ និងបច្ចេកវិទ្យាក្នុងរយៈពេល ៣ថ្ងៃខាងមុខដែលចាប់ផ្ដើមពីថ្ងៃទី ១៤ រហូតដល់ថ្ងៃទី ១៦ខែធ្នូ ឆ្នាំ២០១៨ខាងមុខ។
លោក ឈី កុលបុត្រា ប្រធានក្រុមការងាររៀបចំពិព័រណ៍ យន្តហោះនិងបច្ចេកវិទ្យា បានបញ្ជាក់ថា យន្តហោះទាំង ៩ដែលនឹងដាក់បង្ហាញរួមមាន ឧទ្ធម្ភាគចក្រ ចំនួន ៥ និងយន្តហោះឯកជនចំនួន ៤ផងដែរ ដោយដាក់បង្ហាញក្នុងរយៈពេលទាំង ៣ថ្ងៃនៃពិព័រណ៍។
លោក បន្តថា សម្រាប់អ្នកចូលរួមទាំងអស់ជាពិសេសសិស្សនិស្សិត នឹងទទួលបានសារៈប្រយោជន៍ និងស្វែងយល់កាន់តែច្រើនពីយន្តហោះ ដោយក្នុងពិព័រណ៍នេះ ក៏នឹងមានអ្នកជំនាញនៅចាំពន្យល់និងឆ្លើយសំណួរ របស់អ្នកចូលរួមផងដែរ។
ក្រៅពីការតាំងពិព័រណ៍យន្តហោះ ក៏មានការដាក់បង្ហាញផលិតផល អេឡិចត្រូនិចជា មនុស្សយន្ត ការសរសេរកូត សម្រាប់កែច្នៃផលិតអេឡិចត្រូនិច ដែលសរុបមានចំនួន១៦ស្តង់ផងដែរ។ ផ្សេងពីនេះ ក៏មានការរៀបចំអោយមានការប្រកួតប្រជែង ធ្វើយន្តហោះកៅស៊ូ និងមានសិក្ខាសាលាផ្ដល់ចំណេះដឹងបន្ថែមទៅកាន់អ្នកចូលរួម ទាក់ទងនឹងយន្តហោះ ការហោះហើរ បច្ចេកវិទ្យាផងដែរ។
ការរៀបចំពិព័រណ៍យន្តហោះ និងបច្ចេកវិទ្យា រៀបចំឡើងដោយ សហភាពសហព័ន្ធយុវជនកម្ពុជា ខេត្តស្វាយរៀង និងគាំទ្រដោយកងទ័ពជើងអាកាស និងក្រសួងអប់រំយុវជន និងកីឡា ដែលប្រព្រឹត្តិទៅក្នុងរយៈ ៣ថ្ងៃចាប់ពីថ្ងៃទី ១៤ដល់ថ្ងៃទី ១៦ ក្នុងទីតាំងមូលដ្ឋានទ័ពអាកាសពោធិ៍ចិនតុង៕
