ពលរដ្ឋធ្វើដំណើរតាមរថយន្តក្រុងនិងរថភ្លើងដោយឥតគិតថ្លៃនៅរដូវបុណ្យភ្ជុំនិងចូលឆ្នាំ
សារព័ត៌មាន Cambodia News/
ភ្នំពេញ ៖ ប្រមុខរាជរដ្ឋាភិបាលកម្ពុជា បានប្រកាសផ្តល់ការធ្វើដំណើរតាមរថភ្លើង និង រថយន្តក្រុងរបស់រដ្ឋ ដល់បងប្អូនប្រជាពលរដ្ឋដោយឥតគិតថ្លៃនៅក្នុងពេលបុណ្យភ្ជំបិណ្ឌ និង បុណ្យចូលឆ្នាំប្រពៃណីជាតិជារៀងរាល់ឆ្នាំ ។ ការប្រកាសរបស់ប្រមុខរាជរដ្ឋា ភិបាលបែបនេះគឺក្នុងគោលបំណងជួយសម្រួលការធ្វើដំណើររបស់បងប្អូនប្រជាពលរដ្ឋទៅកាន់ស្រុកកំណើត និង ពីស្រុកកំណើតមកកាន់រាជធានី ភ្នំពេញក្នុងគោលបំណងកាត់បន្ថយការចំណាយរបស់ពលរដ្ឋ ។
នៅក្នុងពិធីជួបសំណេះសំណាលជាមួយកម្មករ កម្មការិនីនិងនិយោជិតប្រមាណជាង ១,៥ ម៉ឺននាក់នៅភូមិអន្លង់ក្រង៉ាន សង្កាត់ឃ្មួញ ខណ្ឌសែនសុខនាព្រឹកថ្ងៃទី១៥ ខែសីហា សម្តេចតេជោ ហ៊ុន សែន បានស្នើឲ្យរដ្ឋមន្ត្រីក្រសួងសាធារណការ និង ដឹកជញ្ជូន ទាក់ទងជាមួយលោកឧកញ៉ា គិត ម៉េង ដើម្បីធ្វើការសម្រួលឲ្យប្រជាពលរដ្ឋ កម្មករ កម្មការិនី ជិះរថភ្លើងដោយមិនគិតថ្លែពីភ្នំពេញទៅ ស្រុកកំណើត និង ពីស្រុកកំណើត មកភ្នំពេញវិញ នៅក្នុងពេលមបុណ្យភ្ជំបិណ្ឌ និង ពេលចូលឆ្នាំជារៀងរាល់ឆ្នាំ ។
សម្តេចបន្តថា ព្រោះតែនៅរដូវបុណ្យភ្ជុំនិងចូលឆ្នាំ ឡានឡើងថ្លៃរហូតអញ្ចឹងយើងត្រូវពង្រាយឡានក្រុងផងនិង រថភ្លើងផង ព្រោះនិយាយគ្នាស្តាប់អត់បានសុំថាកុំឲ្យឡើងថ្លែតែនៅតែឡើង។ ដូចនេះដើម្បីសម្រួលឲ្យកម្មករនិង ប្រជាពលរដ្ឋអាចធ្វើដំណើរទៅកាន់ស្រុកកំណើតយើងចាំ បាច់ត្រូវពង្រាយទាំងឡានក្រុងនិងរថភ្លើង » ៕
