ទឹកទន្លេមេគង្គនៅកម្ពុជានឹងបន្តកើនឡើង ២-៣ ថ្ងៃបន្ថែមទៀត
សារព័ត៌មាន Cambodia News/
រាជធានីភ្នំពេញ (៣១ កក្កដា ២០១៨) ៖ យោងតាមសេចក្ដីប្រកាសរបស់ក្រសួងធនធានទឹក និងឧតុនិយម ចុះថ្ងៃទី៣០ ខែកក្កដា ឆ្នាំ២០១៨ បានឲ្យដឹងថា ដោយសារមានភ្លៀងធ្លាក់ជាបន្តបន្ទាប់ពីមធ្យមទៅច្រើន នៅក្នុងតំបន់អាងទន្លេមេគង្គក្នុងប្រទេសថៃ និងឡាវ វាបានបង្កឲ្យទឹកទន្លេមេគង្គនៅកម្ពុជា បន្តកើនឡើង ២-៣ថ្ងៃបន្ថែមទៀត។
ក្រសួងធនធានទឹក បានព្យាករថា កម្ពស់ទឹកទន្លេមេគង្គលើ នៅកម្ពុជា អាចនឹងកើនឡើងដល់ ៖ នៅថ្ងៃទី៣ ខែសីហា ឆ្នាំ២០១៨ ទន្លេមេគង្គខេត្តស្ទឹងត្រែង ទឹកអាចនឹងកើនឡើងដល់កម្ពស់ ១១,៤០ម៉ែត្រ (កម្ពស់ប្រកាសឲ្យប្រុងប្រយ័ត្ន ១០,៧០ម៉ែត្រ)។ នៅថ្ងៃទី៤ ខែសីហា ឆ្នាំ២០១៨ ទន្លេមេគង្គខេត្តក្រចេះ ទឹកអាចនឹងកើនឡើងដល់កម្ពស់ ២២,១៥ម៉ែត្រ (កម្ពស់ប្រកាសឲ្យប្រុងប្រយ័ត្ន ២២ម៉ែត្រ)។ នៅថ្ងៃទី៥ ខែសីហា ឆ្នាំ២០១៨ ទន្លេមេគង្គខេត្តកំពង់ចាម ទឹកអាចនឹងកើនឡើងដល់កម្ពស់ ១៥,២៥ម៉ែត្រ (កម្ពស់ប្រកាសឲ្យប្រុងប្រយ័ត្ន ១៥,២០ម៉ែត្រ)។
បន្ថែមពីការព្យាករខាងលើ ក្រសួងធនធានទឹក ក៏បានស្នើឲ្យក្រសួង ស្ថាប័នពាក់ព័ន្ធ អាជ្ញាធរដែនដី និងសាធារណជន បង្កើនការប្រុងប្រយ័ត្នខ្ពស់ ដើម្បីជៀសវៀងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុផងដែរ៕
