សម្តេចតេជោបន្តរិះគន់នយោបាយ « ដេកផ្ទះឈ្នះឯង » របស់លោក សម រង្ស៊ី
សារព័ត៌មាន Cambodia News/
ភ្នំពេញ ៖ សម្តេចតេជោ ហ៊ុន សែន បានរិះគន់ជាថ្មីទៀតដល់នយោបាយ « ដេកផ្ទះឈ្នះឯង ឬ ដេកផ្ទះឈ្នះស្អាត » របស់លោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងនិរទេសដោយខ្លួនឯងនៅក្រៅប្រទេស។ ការរិះគន់របស់សម្តេចធ្វើឡើងក្នុងពិធីសំណេះសំណាលជាមួយកម្មករកម្មការិនី នៅខេត្តកំពង់ ឆ្នាំង នៅព្រឹកថ្ងៃព្រហស្បត្តិនេះ។
ទន្ទឹមនោះនឹងអំពាវនាវឲ្យកម្មករ កម្មការិនីទៅបោះឆ្នោតឲ្យបានគ្រប់ៗ គ្នានិងបោះឆ្នោតជូនគណបក្សប្រជាជនកម្ពុជា ដែលមានលេខរៀងទី២០ ដើម្បីរួមគ្នាថែរក្សាការពារសន្តិ ភាពនោះ សម្តេចក៏បានធ្វើការរិះគន់ដល់នយោបាយរបស់លោក សម រង្ស៊ី ដែលអំពាវនាវកុំឲ្យប្រជាពលរដ្ឋទៅបោះឆ្នោតក្រោមស្លាក « ដេកផ្ទះឈ្នះឯង » ។
សម្តេច ហ៊ុន សែន បានសង្កត់ធ្ងន់ថា វាមិនដែលដេកផ្ទះហើយឈ្នះនោះទេ ព្រោះថា សូម្បីតែមនុស្សដេករហូតមិនក្រោកហូបបាយក៏មិនអាចរស់បានដែរ ។ ដូច្នេះគ្មានទេ អ្នកដែល ដេកផ្ទះហើយឈ្នះនោះ ហើយការលើកឡើងដូច្នេះពីក្រុមបក្សនយោបាយប្រឆាំងនោះវាគ្រាន់ជានយោ បាយបោកប្រាស់ប៉ុណ្ណោះ ។ សម្តេចបានផ្តាំទៅវិញថា ដេកទៅដេកឲ្យយូរទៅឆាប់ស្លាប់ ។
ទន្ទឹមនោះសម្តេចក៏អំពាវនាវជាថ្មីទៀត ឲ្យកម្មករកម្មការិនីរួមគ្នាថែរក្សាការពារសន្តិភាព ដើម្បីសុវត្ថិ ភាពការងារផង និងដើម្បីបន្តអភិវឌ្ឍន៍ប្រទេសបន្តទៀត ។ សម្តេចថា វាងាយនោះទេ គឺនាំគ្នាបោះឆ្នោតជូនគណបក្ស ប្រជាជនកម្ពុជា ដែលមានលេខរៀងទី២០ គឺទទួលបានសន្តិភាពហើយ ។ សម្តេចសង្កត់ធ្ងន់ថា សន្តិភាពដែលកំពុងកើតមានសព្វថ្ងៃនេះ គឺកើតឡើងពីបាតដៃរបស់គណបក្សប្រជាជនកម្ពុជា៕
