ខឹងមិនព្រមរួមរ័កជាមួយបុរសជាប្តីវ៉ៃប្រពន្ធជាំមុខខៀវភ្នែក
សារព័ត៌មាន Cambodia News/
ភ្នំពេញ ៖ ដោយសារតែចង់រួមភេទ ហើយត្រូវប្រពន្ធបដិសេធ បុរសជាប្តីបានប្រើអំពើហិង្សាដាក់ប្រពន្ធ បណ្តាលឲ្យជាំមុខខៀវភ្នែក នៅវេលាម៉ោង១២និង១០នារីរំលងអធ្រាត្រ ឈានចូលថ្ងៃទី១២ ខែមិថុនា ឆ្នាំ២០១៨ ត្រង់ចំណុចផ្លូវ១៧២ ជាប់របងវត្តសារាវ័ន្ត ស្ថិតនៅក្នុងសង្កាត់ជ័យជំនះ ខណ្ឌដូនពេញ។
សមត្ថកិច្ចបានឲ្យដឹងថា បុរសជាប្តីមានឈ្មោះ ប៉ាន់ ធន់ អាយុ៥៣ឆ្នាំ ជនជាតិខ្មែរ មុខរបរធ្វើចំការស្វាយ រស់នៅក្នុងភូមិព្រែកលាប សង្កាត់ ព្រែកលាប ខណ្ឌជ្រោយចង្វា។ ប្រពន្ធមានឈ្មោះ មាស សុធា ភេទស្រី អាយុ៣៥ឆ្នាំ ជនជាតិខ្មែរ មុខរបរធ្វើការនៅហាងបារាំង ជិតវត្តសារាវ័ន្ត ក្នុងសង្កាត់ជ័យជំនះ ស្នាក់នៅកន្លែងធ្វើការ មានស្រុកកំណើត នៅភូមិព្រៃសាច់ ឃុំកោះស្តេច ស្រុកការីសាគរ ខេត្តកោះកុង។
តាមសម្តីស្ដ្រីរងគ្រោះបានប្រាប់ឲ្យដឹងថា នៅថ្ងៃកើតហេតុខាងលើនេះ រូបគាត់ត្រូវបានប្តីបង្ខំឲ្យទៅដេកជាមួយគាត់ តែរូបគាត់មិនព្រមទៅ ធ្វើឲ្យប្តីខឹងក៏ទះកំផ្លៀង បណ្តាលឲ្យជាំមុខខៀវភ្នែកស្រែកយំ បង្កឲ្យមានការភ្ញាក់ផ្អើលដល់សមត្ថកិច្ចចុះមកសួរនាំ។
ក្រោយមក សមត្ថកិច្ចក៏នាំប្តីប្រពន្ធនោះ មកប៉ុស្តិ៍នគរបាលរដ្ឋបាលជ័យជំនះ ដើម្បីសម្របសម្រួល។ ខាងប្រពន្ធមិនប្តឹង តែសូមចប់គ្នាត្រឹមនឹង។ សមត្ថកិច្ចក៏ឲ្យប្តីប្រពន្ធចែកផ្លូវគ្នាចាប់ពីពេលនឹងតទៅ ពីព្រោះអ្នកទាំងពីរ មិនបានរៀបការ និងចុះសំបុត្រអាពាហ៍ពិពាហ៍ឡើយ៕
