លោក ត្រាំ ព្រមានថា គីម ជុងអ៊ុន ប្រយ័ត្នមានវាសនាដូច ហ្គាដាហ្វី
អាមេរិក ៖ ប្រធានាធិបតីអាមេរិកលោក ដូណាល់ ត្រាំ បានអះអាងថា លោក គីម ជុងអ៊ុន នឹងនៅតែអាចរក្សាតំណែងជាមេដឹកនាំកូរ៉េខាងជើងដដែល ប្រសិនបើព្រមបោះបង់ចោលកម្មវិធីនុយក្លេអ៊ែរ។ ប៉ុន្តែបើបដិសេធមិនធ្វើតាម លោកនឹងមានវាសនាដូច ម៉ូអាម៉ា ហ្គាដាហ្វី អតីតមេដឹកនាំប្រទេសលីប៊ី។ នេះបើយោងតាមសារព័ត៌មាន Aljazeera។
ការព្រមានរបស់លោក ត្រាំ ធ្វើឡើងកាលពីថ្ងៃទី១៧ឧសភាម្សិលមិញ បន្ទាប់ពីរដ្ឋាភិបាលក្រុងព្យុងយ៉ាងបានគំរាមលុបចោលជំនួបកំពូលរវាងកូរ៉េខាងជើង-អាមេរិក ដែលនឹងរៀបចំឡើងនៅក្នុងប្រទេសសិង្ហបុរី។
បន្ថែមពីនេះ លោក ត្រាំ បញ្ជាក់ថា កូរ៉េខាងជើងនឹងទទួលបានការការពារយ៉ាងរឹងមាំថែមទៀតផងពីសហរដ្ឋអាមេរិក ក្នុងលក្ខខណ្ឌណាដែលជំនួបកំពូលរវាងប្រទេសទាំង២នៅថ្ងៃទី១២មិថុនាខាងមុខ ទទួលបានផ្លែផ្កាល្អ។
ប៉ុន្តែកូរ៉េខាងជើងប្រាប់ថា ការទាមទាររបស់អាមេរិកឲ្យខ្លួនបោះបង់ចោលនុយក្លេអ៊ែរមានលក្ខណៈជាឯកតោភាគី ហើយការលើកយកគំរូពីលីប៊ីជារឿងមិនទំនងទាល់តែសោះ៕
