ក្រុមចម្រុះអារ៉ាប៊ីសាអូឌីតវាយប្រហារលើប្រទេសយេម៉ែនសម្លាប់ជនស៊ីវិល១២នាក់
សារព័ត៌មាន Cambodia News/
យេម៉ែន (០៣ មេសា ២០១៨) ៖ ក្រុមគ្រូពេទ្យនិងសាក្សីបាននិយាយថា ការវាយប្រហារតាមផ្លូវអាកាសរបស់កងកម្លាំងចម្រុះដឹកនាំដោយប្រទេសអារ៉ាប៊ីសាអូឌីតដែលកំពុងប្រយុទ្ធនៅក្នុងប្រទេសយេម៉ែនបានសម្លាប់ជនស៊ីវិលចំនួន១២នាក់នៅក្នុងទីក្រុងហូដេដា (Hodeidah) កាលពីថ្ងៃច័ន្ទ។ ហើយក្រោយមកក្រុមឧទ្ទាមហ៊ូទីបានបាញ់មីស៊ីលមួយដើមដោយដាក់គោលដៅទៅលើតំបន់ព្រំដែនភាគខាងត្បូងរបស់ប្រទេសអារ៉ាប៊ីសាអូឌីតវិញ។
ក្រុមគ្រូពេទ្យ និងជនស៊ីវិលម្នាក់ដែលបានឃើញហេតុការណ៍បាននិយាយថា ការវាយប្រហារតាមផ្លូវអាកាសនោះបានបំផ្លាញផ្ទះមួយនៅក្នុងស្រុកអាល់ ហាលី (al-Hali) ជាកន្លែងដែលជនស៊ីវិលភៀសខ្លួនមកពីខេត្តផ្សេងទៀតបានតាំងទីលំនៅ។ ពួកគេបានបន្តថា ជនរងគ្រោះទាំង១២នាក់នោះគឺជាសមាជិកគ្រួសារមួយ ដែលរួមមានកូនក្មេងចំនួន៧នាក់។
គួរបញ្ជាក់ថា ទីក្រុងហូដេដា (Hodeidah) គឺជាទីតាំងកំពង់ផែដ៏ធំបំផុតរបស់ប្រទេសយេម៉ែន ខណៈដែលជំនួយមនុស្សធម៌ជាច្រើនសម្រាប់ជនស៊ីវិលរាប់លាននាក់ដែលស្ទើរតែធ្លាក់ទៅក្នុងគ្រោះទុរ្ភិក្សនោះបានចូលមកតាមរយៈកំពង់ផែមួយនេះ។ ប៉ុន្តែវាមិនត្រូវបានរងផលប៉ះពាល់ដោយសារការវាយប្រហារតាមផ្លូវអាកាសនោះទេ៕
