បង្កគ្រោះថ្នាក់ចរាចរណ៍ហើយបើករត់ ប្រជាពលរដ្ឋដេញវាយកម្ទេចរថយន្តនិងកម្ចាស់រងរបួសធ្ងន់
សារព័ត៌មាន Cambodia News/
ភ្នំពេញ (១២ មីនា ២០១៨) ៖ មានករណីបុករះជាច្រើនកន្លែងបង្កឡើងដោយបុរសជនជាតិចិនម្នាក់បើកបររថយន្តម៉ាក ហ្គិច ក្នុងល្បឿនលឿន បណ្តាលអោយមានបងប្អូនជាពលរដ្ឋរងរបួសជាច្រើននាក់ ចាប់ពីចំណុចម្ដុំវត្តទួល ក្នុងសង្កាត់ទួលសង្កែ ខណ្ឌឬស្សីកែវ រហូតឃាត់បាននៅចំណុចផ្លូវ២៦៥ កែងផ្លូវ១៥៦ ក្នុងសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។
ប្រភពព័ត៌មានពីប្រជាពលរដ្ឋដែលបានដេញតាមរថយន្តបង្ក បានអោយដឹងថាមុនពេលកើតហេតុ ជនបង្កបានបើករថយន្តរបស់ខ្លួនម៉ាក ហ្គិច ពណ៌ខ្មៅ ពាក់ស្លាកលេខភ្នំពេញ 2AP-9719 បានបុករះកន្លែងបូមកង់ម៉ូតូឡាន បណ្ដាលអោយមានអ្នករងរបួសធ្ងន់២នាក់ ពេលបងប្អូនជាពលរដ្ឋឃើញហេតុការបាននាំគ្នាដេញតាមឃាត់រថយន្តតែម្ចាស់រថយន្តមិនឈប់បានព្យាយាមបើកគេចរត់ រហូតរថយន្តបែកកង់ទៅមុខលែងរួចត្រូវបានប្រជាពលរដ្ឋ វាយកំទេចរថយន្តនិងម្ចាស់រថយន្តបណ្ដាលអោយរងរបួសធ្ងន់។
ពាកព័ន្ធករណីចរាចរណ៍នេះកម្លាំងសមត្ថកិច្ចបានចុះជួយអន្តរាគមន៍ និងទាក់ទងរថយន្តសង្គ្រោះបន្ទាន់យកទៅមន្ទីរពេទ្យ ភ្លាមៗតែម្ដង។ បច្ចុប្បន្នជនបង្កត្រូវបានសម្រាកព្យាបាលនៅមន្ទីរពេទ្យឯកជនចំណែករថយន្តត្រូវបានសមត្ថកិច្ចនាំយកទៅរក្សាទុកដើម្បីរកចាំការការដោះស្រាយនៅពេលក្រោយ៕
