តំណាងក្លឹបអ្នកកាសែតកម្ពុជា ២រូបចូលរួមសន្និសីទកាសែតពិភពលោកនៅកូរ៉េ
សារព័ត៌មាន Cambodia News/
ភ្នំពេញ (០៥ មីនា ២០១៨) ៖ ក្លឹបអ្នកកាសែតកម្ពុជា ( ក.អ.ក ) ដែលជាសមាគមអ្នកសារព័ត៌មានដ៏សកម្មនៅកម្ពុជាបានបញ្ជូនតំណាងរបស់ខ្លួន២រូប ដើម្បីទៅចូលរួមក្នុងសន្និសីទកាសែតពិភពលោកចាប់ពីថ្ងៃទី៥ ដល់ថ្ងៃទី១១ ខែមីនា ឆ្នាំ២០១៨ នៅប្រទេសកូរ៉េ ក្រោមប្រធានបទ ” តួនាទីសារព័ត៌មាន ដើម្បីការរំសាយអាវុធនុយក្លេអ៊ែរនៅឧបទ្វីបកូរ៉េ និងសន្តិភាពពិភពលោក”។
នៅក្នុងសន្និសីទកាសែតពិភពលោកនេះមានការអញ្ជើញចូលរួមពីអ្នកកាសែតប្រមាណ៧០នាក់មកពី៥០ប្រទេសលើពិភពលោក។ តំណាងក្លឹបអ្នកកាសែតកម្ពុជាទាំង២រូបរួមមាន លោក ឆាយ សុផល និង លោក លាង ដឺលុច ។ ការចូលរួមក្នុងសន្និសីទកម្រិតពិភពលោកខាងលើនេះ គឺជាការឆ្លើយតបទៅនឹងការអញ្ជើញរបស់ សមាគមអ្នកកាសែតកូរ៉េ តាមរយៈស្ថានទូតកូរ៉េប្រចាំកម្ពុជា៕
