រដ្ឋមន្ត្រីក្រសួងព័ត៌មាន ៖ អ្នកកាសែតដឹកឈើជា អ្នកកាសែតអាក្រក់បំផ្លាញអ្នកកាសែតល្អ
សារព័ត៌មាន Cambodia News/
ភ្នំពេញ (២៩ មករា ២០១៨) ៖ នៅលើហ្វេសប៊ុកផ្លូវការនាព្រឹកព្រលឹមថ្ងៃចន្ទ ទី២៩មករា ឯកឧត្តម ខៀវ កាញារីទ្ធ បានបង្ហោះរូបថត២ សន្លឹកបង្ហាញពីឈើក្នុងឃ្លុបឡានខាងក្រោយ និងប័ណ្ណចេញដោយក្រសួងព័ត៌មានដាក់មុខឡាន ហើយសរសេរយ៉ាងខ្លីថា “អ្នកកាសែត អាក្រក់ បំផ្លាញអ្នកកាសែត ល្អ”។
សាររបស់ឯកឧត្តមរដ្ឋមន្ត្រីក្រសួងព័ត៌មាន ធ្វើឡើង បន្ទាប់ពីមន្ត្រីយោធា និងជាអ្នកយកព័ត៌មានដោយមានម្នាក់ដែលឈ្មោះ២ផ្សេងគ្នា ពោលនៅខាងយោធាមានឈ្មោះ ហាក់ ប៉ូលីស ពាក់ស័ក្តិ២ និងខាងវិស័យព័ត៌មានវិញមានឈ្មោះ សួស ណៃ អ្នកយកព័ត៌មានឲ្យកាសែត “សេរីភាពខ្មែរ” ត្រូវបានសមត្ថកិច្ចឃាត់ខ្លួន ជាមួយនឹងរថយន្តដឹកឈើ។
រដ្ឋមន្ត្រីក្រសួងព័ត៌មាន ឯកឧត្តម ខៀវ កាញារីទ្ធ បានសម្តែងការមិនពេញចិត្តនឹងទង្វើរបស់អ្នកកាសែតម្នាក់ដែលយកឈ្មោះជាអ្នកកាសែត មានទាំងប័ណ្ណដាក់មុខឡាន ចេញដោយក្រសួងព័ត៌មាន ដឹកឈើ នោះទៅវិញ ។ទង្វើនោះ ត្រូវបានឯកឧត្តមរដ្ឋមន្ត្រី ចាត់ទុកថាជាការបំផ្លាញអ្នកកាសែតល្អ៕
