មនុស្ស៦០នាក់ស្លាប់ និងរបួស ក្នុងការវាយប្រហារដោយគ្រាប់បែកនៅនីហ្សេរីយ៉ា
សារព័ត៌មាន Cambodia News/
នីហ្សេរីយ៉ា (១៨ មករា ២០១៨៖ ប្រជាពលរដ្ឋនិងមន្ត្រីម្នាក់បាននិយាយថា ការបំផ្ទុះគ្រាប់បែកអត្តឃាតចំនួន២នៅផ្សារមួយកន្លែងស្ថិតក្នុងទីក្រុងម៉ៃឌូហ្គូរី (Maiduguri) ភាគខាងជើងប្រទេសនីហ្សេរីយ៉ាបានបណ្តាលឲ្យមនុស្សយ៉ាងតិច១២នាក់បាត់បង់ជីវិត និង៤៨នាក់ផ្សេងទៀតរងរបួស។ ការវាយប្រហារដោយគ្រាប់បែកអត្តឃាតនោះបានកើតឡើងកាលពីរសៀលថ្ងៃពុធ។
ប្រធានប្រតិបត្តិការសង្គ្រោះនៅក្នុងទីភ្នាក់ងារគ្រប់គ្រងគ្រោះអាសន្នរដ្ឋបាននិយាយថា អ្នកបំផ្ទុះគ្រាប់បែកអត្តឃាតទាំង២នោះមានម្នាក់គឺជាស្ត្រី និងម្នាក់ទៀតគឺជាបុរស ហើយអ្នកបំផ្ទុះដែលជាស្ត្រីបានធ្វើការវាយប្រហារនៅខាងក្នុងផ្សារនោះ។
ផ្សារមួយកន្លែងនេះគឺជាទីតាំងជំរំមួយសម្រាប់ជនភៀសខ្លួន ហើយត្រូវបានរងការវាយប្រហារជាច្រើនលើកនៅក្នុងរយៈពេលប៉ុន្មានឆ្នាំចុងក្រោយនេះពីសំណាក់ក្រុមបះបោរបូកូ ហារ៉ាម (Boko Haram)
គួរបញ្ជាក់ថា ក្រុមបះបោរបូកូ ហារ៉ាម (Boko Haram) ដែលត្រូវបានបង្កើតឡើងនៅក្នុងទីក្រុងម៉ៃឌូហ្គូរី (Maiduguri) នេះបានសម្លាប់មនុស្សជាង២ម៉ឺននាក់នៅក្នុងការបះបោររបស់ពួកគេអស់រយៈពេល៩ឆ្នាំ៕
