ក្រុមអ្នកយកព័ត៌មានទូរទស្សន៍អប្សរាជួបគ្រោះថ្នាក់ចរាចរណ៍នៅស្រុកព្រៃនប់
សារព័ត៌មាន Cambodia News/
ព្រះសីហនុ (២៦ ធ្នូ ២០១៧) ៖ បុរស៣នាក់ និងស្ត្រីម្នាក់បានរងរបួសស្រាលក្នុងករណីគ្រោះថ្នាក់ចរាចរណ៍មួយកើតឡើងរវាងរថយន្តHYUNDAIបានបុកជាមួយរថយន្តNISSAN នៅវេលាម៉ោង០៦ និង២០នាទីព្រឹកថ្ងៃទី២៦ ខែធ្នូ ឆ្នាំ២០១៧ លើផ្លូវជាតិលេខ៤ ចន្លោះគីឡូម៉ែត្រ១៩៩-២០០ នៅក្នុងភូមិអូរតាសេក ឃុំអូរឧកញ្ញ៉ាហេង ស្រុកព្រៃនប់ ខេត្តព្រះសីហនុ។
តាមប្រភពព័ត៌មានពីកន្លែងកើតហេតុបានឲ្យដឹងថា គ្រោះថ្នាក់ចរាចរណ៍នេះកើតឡើង រវាង រថយន្ត១គ្រឿងម៉ាក HYUNDAI ពណ៌ស ពាក់ស្លាកលេខភ្នំពេញ3A-5998 ដឹកទំនិញ មានទិសដៅពីខេត្តព្រះសីហនុ ឆ្ពោះទៅ ភ្នំពេញ លុះដល់ចំណុចខាងលើក៏បានបុកនឹងរថយន្ត១គ្រឿងម៉ាក NISSAN ពណ៌ស ពាក់ស្លាកលេខ ភ្នំពេញ 2x-6815 ជិះគ្នាចំនួន៤នាក់ស្រី១នាក់ (ជាបុគ្គលិកទូរទស្សន៍អប្សរា) ដែលមានទិសដៅបញ្ច្រាសទិសគ្នា។
ប្រភពដដែលបន្តទៀតថា គ្រោះថ្នាក់នេះបណ្ដាលឲ្យរងរបួសស្រាលមនុស្សចំនួន៤នាក់ស្រី១នាក់ បានបញ្ជូនទៅព្យាបាលនៅគ្លីនិកលិគឹមឌីវាលរេញ។ បច្ចុប្បន្នវត្ថុតាងរថយន្តទាំង ២គ្រឿង ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកព្រៃនប់រង់ចាំការដោះស្រាយទៅតាមផ្លូវច្បាប់៕ ដោយ៖ សហការី
