សម្តេចតេជោ ចង់ឃើញប្រាក់ចំណូលមធ្យមក្នុងប្រជាពលរដ្ឋម្នាក់ៗ មិនជាង៣ពាន់ដុល្លារ
សារព័ត៌មាន Cambodia News/
ភ្នំពេញ (២១ ធ្នូ ២០១៧) ៖ ថ្លែងទៅកាន់កម្មករ និយោជិត ជាង១ម៉ឺននាក់ នៅព្រឹកថ្ងៃទី២០ ខែធ្នូ ប្រមុខរាជរដ្ឋាភិបាលកម្ពុជា បានមានប្រសាសន៍ថា៖ «ពូបានប្រកាសរួច ហើយ និងឈរឈ្មោះជានាយករដ្ឋមន្ត្រី មិនតិចជាង១០ឆ្នាំទៀត ។ ពូចង់ឃើញនូវសមិទ្ធផលទាំងឡាយដែលពូបានខិតខំធ្វើជាមួយឳពុកម្តាយ ជីដូនជីតា របស់ក្មួយៗ បង្កើតឡើង តើវាទៅដល់ណា។
សម្តេចបន្តថា ពូចង់ឃើញអត្រានៃភាពក្រីក្ររបស់ប្រទេសនេះ ស្ថិតនៅទាបបំផុត។ ពូចង់ឃើញប្រាក់ចំណូលរបស់ប្រជាពលរដ្ឋម្នាក់ មិនស្ថិតនៅត្រឹម១.៥០០ដុល្លារក្នុង១ឆ្នាំ ដូចថ្ងៃនេះទេ ពូលចង់ឃើញថា នៅពេលពូចាកចេញពីតំណែង គឺប្រាក់ចំណូលរបស់ពលរដ្ឋម្នាក់ៗមិនតិចជាង ៣.០០០ ដុល្លារនៅទេ» ទោះបីមិនទាន់គ្រប់គ្រាន់ តែបើប្រៀបធៀបពីចំណុចសូន្យ គឺវាច្រើន។
សម្តេចតេជោ នាយករដ្ឋមន្ត្រី បានបន្តថា៖ កម្មករ សព្ធថ្ងៃនេះ រកប្រាក់ចំណូលបានច្រើនជាងប្រាក់មធ្យមភាគ សម្រាប់ពលរដ្ឋម្នាក់ៗ ដោយប្រាក់ចំណូលរបស់កម្មករម្នាក់ សព្ធថ្ងៃ មានជាង ២.០០០ ដុល្លារក្នុង១ឆ្នាំ គឺច្រើនជាងការគណនា ដោយក្រសួងសេដ្ឋកិច្ចនិងហិរញ្ញវត្ថុ។ សម្តេចតេជោ បានបន្តថា បើតាមការគណនារបស់អង្គការសហប្រជាជាតិ បានកំណត់ថា អ្នកដែលរស់នៅក្រោមបន្ទាត់ នៃភាពក្រីក្រ គឺរកប្រាក់ចំណូល បានក្រោម ១,២៥ ដុល្លារអាមេរិក ក្នុង១ថ្ងៃ។ ក៏ប៉ុន្តែពលរដ្ឋកម្ពុជា សព្វថ្ងៃរកប្រាក់ចំណូលបានមិនទាបជាង៥ ដុល្លារអាមេរិកទេ ក្នុង១ថ្ងៃ ។ នេះបង្ហាញថា យើងបានស្ថិតនៅលើបន្ទាត់នៃភាពក្រីក្រ ដែលធ្វើឲ្យជីវភាពរបស់កម្មករមានភាពប្រសើរឡើង៕
