អគ្គនាយកដ្ឋានពន្ធដារ នឹងចាប់ឃាត់យានយន្ត ដែលមិនបង់ពន្ធ
សារព័ត៌មាន Cambodia News/
ភ្នំពេញ (០១ ធ្នូ ២០១៧) ៖ អគ្គនាយកដ្ឋានពន្ធដារបានប្រកាសឲ្យ ម្ចាស់យានយន្តទាំងអស់ទៅប្រកាសបង់ពន្ធបានគ្រប់ៗគ្នា និងបានទាន់ពេលវេលា ស្រមតាមបទប្បញ្ញតិ្តនៃច្បាប់ធរមាន ដើម្បីចៀសវាងនូវការឃាត់យានយន្ត តាមដងផ្លូវតម្រូវឲ្យបង់ពន្ធ ដែលអាចនាំឲ្យមានការប៉ះពាល់ការធ្វើដំណើរ និងអាចកើតមាននូវបាតុភាពអសកម្មដោយប្រការណាមួយ។
អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុចេញសេចក្តីជូនដំណឹងស្តីពី ការបិទបញ្ចប់ ការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ សម្រាប់ឆ្នាំ២០១៧ ត្រឹមម៉ោង៥៖០០នាទីរសៀល ថ្ងៃទី៣០ ខែវិច្ឆិកា ឆ្នាំ២០១៧ ។
អគ្គនាយកដ្ឋានពន្ធដារ ក៏បានបញ្ជាក់ទៀតថា ក្នុងករណីខកខានមិនបានបង់ពន្ធទាន់ពេលវេលាតាមការកំណត់ខាងលើ ម្ចាស់យានយន្តក៏អាចបន្តអញ្ជើញទៅបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ សម្រាប់ឆ្នាំ២០១៧ បានផងដែរ នៅតាមសាខាពន្ធដារខេត្ត ខណ្ឌ ឬនៅតាមធនាគារកាណាឌីយ៉ា ឬធនាគារអេស៊ីលីដា ឬធនាគារវឌ្ឍនៈ ឬនៅធនាគារកម្ពុជាសាធារណៈ ដោយត្រូវទទួលរងនូវទោសទណ្ឌតាមច្បាប់ ស្តីពីសារពើពន្ធជាធរមាន៕
