អាជ្ញាធរមីនកម្ពុជានឹងចុះវាយតម្លៃផលប៉ះពាល់នៅទីតាំងគ្រាប់បែករបស់អាមេរិកក្នុងខេត្តស្វាយរៀង
សារព័ត៌មាន Cambodia News/
ភ្នំពេញ (២៩ កញ្ញា ២០១៧) ៖ អាជ្ញាធរមីនកម្ពុជា នឹងដឹកនាំមន្ត្រីជំនាញពាក់ព័ន្ធចុះវាយតម្លៃករណីគ្រាប់បែកគីមីដ៏គ្រោះថ្នាក់បំផុត របស់អាមេរិកដែលទម្លាក់លើទឹកដីខ្មែរ នៅក្នុងឃុំគគីរ ស្រុករមាសហែក ខេត្តស្វាយរៀង នៅថ្ងៃទី២៩ ខែកញ្ញា ឆ្នាំ២០១៧នេះ។
ទេសរដ្ឋមន្ត្រីលោក សេរី កុសល អនុប្រធានទី១អាជ្ញាធរមីនកម្ពុជាបានថ្លែងឲ្យដឹងថា ការចុះទៅកាន់ទីតាំងគ្រាប់បែកគីមីនេះ ត្រូវបានគេដឹងថា ធ្វើឡើងបន្ទាប់ពីប្រជាពលរដ្ឋ សិស្សានុសិស្ស និងព្រះសង្ឃ នៅជុំវិញតំបន់នោះសម្តែងក្តីព្រួយបារម្ភ និងភ័យខ្លាចចំពោះគ្រាប់បែកគីមីនេះ និងបន្ទាប់ពីប្រមុខរាជរដ្ឋាភិបាលកម្ពុជា សម្តេច ហ៊ុន សែន សម្រេចឲ្យប្រើកញ្ចប់ថវិកាពិសេសរបស់រាជរដ្ឋាភិបាល ដើម្បីដោះស្រាយបញ្ហាអាវុធគីមី ដែលកំពុងបង្កការភ័យខ្លាចយ៉ាងខ្លាំង ដល់ប្រជាពលរដ្ឋនៅតំបន់នោះ ៕
