អូស្ត្រាលី ចង់ឃើញការធ្វើប្រជាមតិទទួលស្គាល់ជនជាតិដើម
នាយករដ្ឋមន្ត្រីអូស្ត្រាលី លោក Kevin Rudd មានប្រសាសន៍ថា លោកចង់ឃើញការធ្វើប្រជាមតិអំពីការទទួលស្គាល់ជនជាតិដើម អូស្ត្រាលីនៅក្នុងរដ្ឋធម្មនុញ្ញ នៅក្នុងរដ្ឋសភាអាណត្តិបន្ទាប់។
រដ្ឋាភិបាលក្រោមការដឹកនាំដោយ លោកស្រី Julia Gillard ដែលទើបបាត់បង់តំណែងនោះ បានដកចេញនូវគម្រោងធ្វើប្រជាមតិលើបញ្ហានេះដោយលើកឡើងថា សាធារណជនមានការយល់ដឹងតិចតួចអំពីតម្រូវការដើម្បីការផ្លាស់ ប្តូរ។
លោក Kevin Rudd បានធ្វើដំណើរទៅតំបន់ Arnhem Land ក្នុងដែនដីអូស្ត្រាលីខាងជើង ដើម្បីចូលរួមខួបលើកទី៥០ នៃការទទួលស្គាល់ញត្តិសរសេរលើសំបកឈើរបស់ជនជាតិភាគតិច អូស្ត្រាលី ដែលជាជំនួយក្នុងការកកើតនៃចលនាទាមទារកម្មសិទ្ធិទឹកដី របស់ជនជាតិភាគតិចអូស្ត្រាលី។
លោក Kevin Rudd បានទទួលស្គាល់ថា ទស្សកិច្ចរបស់លោក បានរំលេចនូវការអំពាវនាវជាថ្មី ពីអ្នកដឹកនាំជនជាតិភាគតិចអូស្ត្រាលី ដើម្បីឲ្យរដ្ឋាភិបាលអូស្ត្រាលីផ្តល់អាទិភាពខ្ពស់ ដល់ការទទួលស្គាល់ជនជាតិដើមអូស្ត្រាលីក្នុងរដ្ឋធម្មនុញ្ញជាតិ។
“I want this done in the next term of the Australian parliament that’s what I really want to see and I really want to achieve that bipartisan consensus as rapidly as possible.”
លោក Kevin Rudd មានប្រសាសន៍ថា លោកចង់ឲ្យមានការធ្វើដូច្នេះនៅក្នុងអាណត្តិបន្ទាប់របស់ សភាអូស្ត្រាលី។ នោះគឺជាអ្វីដែលលោកពិតជាចង់ឃើញ និងចង់ទទួលបានការយល់ព្រមរួមគ្នា ក្នុងពេលឆាប់តាមដែលអាចធ្វើទៅបាន៕ (Radio Australia)
