ទីក្រុងភ្នំពេញអាចមានខ្សែរថភ្លើងឆ្ពោះទៅព្រលានយន្ដហោះ
សារព័ត៌មាន Cambodia News/
ភ្នំពេញ (០៨ សីហា ២០១៧) ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី បានស្នើឲ្យប្រទេសជប៉ុនជួយគម្រោងវិនិយោគសាងសង់ផ្លូវរថភ្លើងលើអាកាស (Sky train) ដែលមានតម្លៃ៨០០លានដុល្លារអាមេរិក ខណៈកន្លងមក ក្រុមហ៊ុន Royal Railway បានលើកគម្រោងរថភ្លើងធុនស្រាលមួយ ចេញពីស្ថានីយរាជាយស្ម័យយានទៅកាន់ព្រលានយន្តហោះអន្តរជាតិភ្នំពេញ ហើយគ្រោងដាក់ឲ្យដំណើរការនៅឆ្នាំ២០១៨ ។
សម្តេចតេជោ ហ៊ុន សែន បានសរសេរលើទំព័របណ្តាញទំនាក់ទំនងសង្គមរបស់សម្តេចកាលពីរាត្រីថ្ងៃទី៦ សីហា កន្លងមកថា នៅក្នុងដំណើរទស្សនកិច្ច៣ថ្ងៃនេះ សម្តេចតេជោ នឹងជួបពិភាក្សាការងារជាមួយលោកនាយករដ្ឋមន្ត្រី Shinzo Abe ហើយនឹងចុះហត្ថលេខាលើឯកសារសំខាន់ចំនួន២ ដែលមានទឹកប្រាក់ប្រមាណជាង២៤០លានដុល្លារ ។
ទន្ទឹមនឹងនេះ សម្តេចតេជោនឹងពិភាក្សាអំពីគម្រោងសាងសង់ផ្លូវរថភ្លើងលើអាកាស ពីរាជធានីភ្នំពេញឆ្ពោះទៅអាកាសយានដ្ឋានអន្តរជាតិភ្នំពេញ ដែលមានទឹកប្រាក់ប្រមាណ៨០០លានដុល្លារអាមេរិក ៕
