លោកស៊ិនហ្សូ អាបេ ធ្វើឱ្យសម្តេចតេជោភ្ញាក់ផ្អើលបំផុត
សារព័ត៌មាន Cambodia News/
ភ្នំពេញ (០៨ សីហា ២០១៧) ៖ លោកនាយករដ្ឋមន្ត្រីជប៉ុន ស៊ិនហ្សូ អាបេ (Shinzo Abe) បានបង្កភាពភ្ញាក់ផ្អើលមួយ ជូនសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយការរៀបចំនិងជូនពរថ្ងៃខួបកំណើតពិតប្រាកដរបស់សម្តេចតេជោ ដែលធ្វើឱ្យអ្នកចូលរួមទាំងអស់មានការភ្ញាក់ផ្អើលយ៉ាងខ្លាំង នៅក្នុងអំឡុងពេលពិធីលៀងសាយភោជន៍នៅទីក្រុងតូក្យូ ប្រទេសជប៉ុនល្ងាចថ្ងៃទី០៧ សីហា ២០១៧ ខណៈសម្តេចបានដឹកនាំគណៈប្រតិភូជាន់ខ្ពស់កម្ពុជាបំពេញទស្សនកិច្ចផ្លូវការនៅប្រទេសជប៉ុន ចាប់ពីថ្ងៃទី០៦ ដល់ថ្ងៃទី០៩ ខែសីហា
ខណៈពេលដែលពិធីលៀងសាយភោជន៍កំពុងប្រព្រឹត្តិទៅយ៉ាងសប្បាយរីករាយ ស្រាប់តែឮសម្លេងភ្លេងជូនពរថ្ងៃខួបកំណើត ដែលធ្វើអោយអ្នកចូលរួមទាំងអស់មានការភ្ញាក់ផ្អើល ហើយគ្រប់ៗគ្នាបានបែរមុខទៅរកតុរបស់សម្តេចតេជោ និងលោកនាយករដ្ឋមន្ត្រីជប៉ុនដែលកំពុងអង្គុយរួមតុជាមួយគ្នា។
តាមរយៈវីដេអូនិងសារក្នុងហ្វេសប៊ុករបស់សម្តេចតេជោបានបង្ហាញថា ៖ ពេលនោះ ស្រាប់តែឃើញមនុស្សម្នាក់កាន់នំខួបកំណើតដើរសំដៅទៅរកតុរបស់សម្តេចតេជោ ហើយលោក Shinzo Abe ក៏បានច្រៀងចំរៀងជូនពរថ្ងៃខួបកំណើត អមជាមួយភ្លេងដែលកំពុងលេង។ ក្រោយពីភ្លេងចប់ លោក Abe បានមានប្រសាសន៍ថា «ជូនពរថ្ងៃខួបកំណើតសម្តេចតេជោ» ហើយសម្តេចតេជោ ក៏បានផ្លុំពន្លត់ភ្លើងទៀន ក្រោមស្នូរទះដៃអបអរសាទរយ៉ាងកងរំពង ប្រកបដោយបរិយាកាសស្និទ្ធិស្នាល និងរីករាយបំផុត៕
សូមបញ្ជាក់ថា សម្តេចតេជោបានដឹកនាំគណៈប្រតិភូជាន់ខ្ពស់កម្ពុជាបំពេញទស្សនកិច្ចផ្លូវការនៅប្រទេសជប៉ុន ចាប់ពីថ្ងៃទី០៦ ដល់ថ្ងៃទី០៩ ខែសីហា ។