កូនស្រីវិកលចរិតកាប់ឪពុក១៨កាំបិត បណ្តាលឲ្យស្លាប់ក្រោយបញ្ជូនមកមន្ទីរពេទ្យ
សារព័ត៌មាន Cambodia News/
ស្វាយរៀង (០៨ សីហា ២០១៧) ៖ បុរសវ័យចំណាស់ម្នាក់ ត្រូវកូនស្រីវិកលចរឹតកាប់ប្រហារចំនួន១៨កាំបិត ឈាមហូរស្រោចខ្លួន បណ្តាលឲ្យរងបួសធ្ងន់ធ្ងរដេកសន្លប់នៅក្នុងថ្លុកឈាមគួរឲ្យសង្វេគ ហើយបានក្រុមគ្រួសារបានដឹកបញ្ជូនមកមន្ទីរពេទ្យខេត្តដើម្បីសង្គ្រោះ ក៏ប៉ុន្តែដោយមុខរបួសធ្ងន់ធ្ងរពេកមិនអាចជួយសង្គ្រោះបាន ហើយបានស្លាប់នៅវេលាម៉ោង៨ និង៣០នាទីយប់ ថ្ងៃទី៦ សីហា ២០១៧ នៅក្នុងមន្ទីរពេទ្យ។
បើតាមសមត្ថកិច្ចនគរបាលស្រុកស្វាយជ្រំបានឲ្យដឹងថា ជនរងគ្រោះដែលកូនស្រីកាប់ប្រហារឈ្មោះ ព្រំ សាមឿន ភេទប្រុស អាយុ៧៣ឆ្នាំ មុខរបរកសិករ មានទីលំនៅភូមិខ្នុរខាងជើង ឃុំស្វាយអង្គ ស្រុកស្វាយជ្រំ។ រីឯកូនស្រីឈ្មោះ ឃឹម ស្រីនួន អាយុ២៥ឆ្នាំ មានជំងឺសរសៃប្រសាទរយៈពេល៣ឆ្នាំមកហើយ។
ក្រោយមកជំងឺបានធូរស្រាលនាងមិនកាច រស់នៅធម្មតាបានប្រមាណពីរបីខែមកហើយ រហូតមកដល់ថ្ងៃទី៤ សីហា ២០១៧ វេលាម៉ោង៩ព្រឹក មិនដឹងយ៉ាងម៉េចស្រាប់តែទាញកាំបិតប៉័ងតោ កាប់ប្រហារទៅលើឪពុកយ៉ាងរន្ថើនដូចជាដំរីចុះប្រេង កាប់ចំក្បាល ចំដងខ្លួន ចំស្មា ចំដៃសងខាង ចំក្បាលជង្គង់ កំភួនជើង សរុបចំនួន១៨កាំបិតហូរឈាមស្រោចខ្លួនសន្លប់នៅក្នុងថ្លុកឈាម គួរឲ្យរន្ធត់។
បន្ទាប់មកក្រុមគ្រួសារបានដឹកជនរងគ្រោះមកមន្ទីរពេទ្យខេត្តដើម្បីសង្គ្រោះ ហើយបានស្លាប់នៅវេលាម៉ោង៨ និង៣០នាទីយប់ ថ្ងៃទី៦ សីហា ២០១៧ ក្រុមគ្រួសារ យកទៅធ្វើបុណ្យតាមប្រពៃណី។ ចំណែកកូនស្រីដែលមានជំងឺសរសៃប្រសាទនោះ ក្រុមគ្រួសារចាប់ចងដាក់ច្រវ៉ាក់ នៅក្រោមផ្ទះ និងមិនប្តឹងសមត្ថកិច្ចទេ ដូច្នេះសមត្ថកិច្ចក៏មិនបានចាប់ខ្លួនដែរ៕
