ខឹងម្តាយមិនលក់ផ្ទះយកប្រាក់ចែកគ្នា លោកកូនចិត្តខ្លាំងដុតចោលឆេះហ្មត់
សារព័ត៌មាន Cambodia News/
ភ្នំពេញ (០៤ សីហា ២០១៧) ៖ កូនប្រុសអគតិជាមនុស្សញៀនថ្នាំ ដុតសង់អំពីឈើលើថ្មក្រោមមួយខ្នងឆេះហ្មត់គ្មានសល់ដោយសារតែខឹងម្តាយមិនលក់យកលុយចែក គ្នា ក្រោយពីដុតផ្ទះបានប្រមាណជាង៤ម៉ោង ក៍ត្រូវនគរបាលឃាត់ខ្លួន ។ អគ្គីភ័យនេះបង្កឱ្យមានការភ្ញាក់ផ្អើលកាលពីវេលាម៉ោង២ និង៤០នាទីរសៀល ថ្ងៃទី២ សីហា ស្ថិតនៅតាមផ្លូវបេតុង ក្នុងភូមិដីថ្មីសង្កាត់គោកឃ្លៀង ខណ្ឌសែនសុខ ។
តាមសាក្សីបានអោយដឹងថា នៅមុនពេលកើតហេតុ ម្ចាស់ផ្ទះដែលជាម្តាយពុំនៅផ្ទះនោះទេ ហើយកូនប្រសាស្រីទៅលក់ដូរបាត់នៅសល់តែកូនប្រុសបងឈ្មោះមាស សីហា អាយុ៣៣ឆ្នាំ ជាមនុស្សញៀនថ្នាំ និងមិត្តភក្តិម្នាក់ទៀត អង្គុយផឹកក្រោមផ្ទះ ស្រាប់តែភ្លើងបានឆាបឆេះឡើងសន្ធោសន្ធៅតែម្តង ។
តាមព័ត៌មានឱ្យដឹងថា បន្ទាប់ពីដុតផ្ទះហើយ បុរសញៀនថ្នាំបានរត់គេចខ្លួន ហើយត្រូវបាននគរបាលខណ្ឌសែនសុខស្រាវជ្រាវ ឃាត់ខ្លួនបាននៅវេលាម៉ោងប្រមាណ៦ និង៣០នាទីល្ងាច ។ តាមបុរសញៀនថ្នាំបានសារភាពថា រូបគេជាអ្នកដុតដោយសារតែខឹងមិនលក់ផ្ទះចែកគ្នា ព្រមទាំងម្តាយចេះតែជេរស្តី បន្ទោសជាញឹកញាប់ ។ នៅពេលដែលប្អូនមិននៅផ្ទះ ក៏បានដុតចោលតែម្តងឱ្យខាននៅទាំងអស់គ្នា ៕
