ភូមិខ្មែរបូរាណក្នុងព្រឹត្តិការណ៍អង្គរសង្រ្កាន្ត
សំ ច័ន្ទម៉ាលីនី និង អាន ដាញ់ស៊ីប៉ូ
សៀមរាប៖ ភូមិខ្មែរមួយដែលមានផ្ទះបុរាណជាច្រើនខ្នងជាមួយនឹងរចនាបទខុសៗគ្នាចំនួន៨ ត្រូវបានរៀបចំឡើង និងដាក់បង្ហាញជូនភ្ញៀវទេសចរជាតិនិងអន្តរជាតិនៅក្នុងពិធីបុណ្យចូលឆ្នាំប្រពៃណីជាតិខ្មែរខាងមុខនេះ នៅតំបន់ប្រាសាទអង្គរខេត្តសៀមរាប បរិវេណខាងជើងប្រាសាទបាយ័ន ឈាងទីលានជល់ដំរី។
ផ្ទាំងទស្សនីយភាព «ភូមិខ្ញុំ» មានដាក់បង្ហាញ ផ្ទះមន្ត្រី និងផ្ទះសេដ្ឋីដែលសាងសង់ពីឈើនិងមានដំបូលជាសណ្ឋានប្រក់ក្បឿង ព្រមទាំងផ្ទះអ្នកភូមិ ដែលសាងសង់ពីស្បូវនិងស្លឹកត្នោត រួមទាំងវត្ថុប្រើប្រាស់ជាច្រើនទៀត ។ មិនត្រឹមតែមានជាផ្ទះបុរាណនោះទេ នៅក្នុង«ភូមិខ្ញុំ» ក៏មានរៀបចំជាការសម្តែងពីជីវភាពរស់នៅរបស់ប្រជាជនខ្មែរក្រោយសម័យអង្គរ សកម្មភាពទីផ្សារលក់ដូរ ក៍ដូចជា គ្រឿងបុរាណ សម្រាប់ដាក់តាំងលម្អក្នុងផ្ទះ។ ក្នុងនោះមានជាការបង្ហាញសិល្បៈខ្មែរ និងក្បាច់គុណបុរាណ ព្រមទាំងមានការបង្ហាញពីសកម្មភាពរស់នៅប្រចាំថ្ងៃរបស់ប្រជាជនតាមប្រពៃណីខ្មែរ។
លោក សេក សាវុធ ប្រធានគណៈកម្មាធិការរៀបចំមហោស្រពទស្សនីយភាព និងភូមិខ្មែរ «ភូមិខ្ញុំ» បានលើកឡើងថា ភូមិខ្មែរនេះសំដៅលើគំរូផ្ទះខ្មែរនាសម័យកាលក្រោយអង្គរ ហើយភូមិខ្មែរបុរាណដែលនឹងដាក់បង្ហាញនៅក្នុងព្រឹត្តិការណ៍អង្គរសង្ក្រាន្ត អាចក្លាយជាទស្សនីយភាពមួយដែលអាចនាំអារម្មណ៍ភ្ញៀវទេសចរចូលទៅក្នុងអតីតកាលរាប់សតវត្សរ៍កន្លងមកដោយសារតែភូមិខ្ញុំត្រូវបានស្ថាបនាឡើងតាមបែបរចនាបទខ្មែរបុរាណ។ លោកបាននិយាយថា៖ “ការរៀបចំឲ្យមានផ្ទះបុរាណនេះឡើងគឺចង់បញ្ជាក់ពីការចូលឆ្នាំរបស់ខ្មែរយើង សំខាន់អោយកូនខ្មែរយល់ពីអត្តសញ្ញាណខ្មែរយើងពីដើមមកតើមានអ្វី”។
លោកបានបន្ថែមថា មកទល់នឹងថ្ងៃនេះ ការសាងសង់និងការរៀបចំភូមិនេះមានរយៈពេល៣សប្តាហ៍មកហើយ និងបានសម្រេចជិត ១០០% ហើយ ដោយមិនមានជួបផលលំបាកអ្វីជាចម្បងនោះទេ ហើយភ្ញៀវទេសចរជាតិនិងអន្តរជាតិអាចចូលរួមទស្សនាដោយសេរី ដើម្បីបានយល់ដឹងបន្ថែមពីស្ថាបត្យកម្ម និងរចនាបទបុរាណខ្មែរនាសម័យឧត្តុង្គ។
គួរបញ្ជាក់ដែរថា ការរៀបចំភូមិខ្មែរបុរាណនេះគឺជាផ្នែកមួយនៃកម្មវិធីទស្សនីយភាពក្នុងចំណោម កម្មវិធី ដែលបង្ហាញពីវប្បធម៌ប្រពៃណីនិងការកម្សាន្តសប្បាយរបស់ប្រជាជនកម្ពុជានៃព្រឹត្តិការណ៍ “អង្គរសង្រ្កាន្ត” ជាច្រើន ដែលត្រូវបានរៀបចំឡើងដោយសហភាពសហព័ន្ធយុវជនកម្ពុជា (ស.ស.យ.ក) សហការជាមួយក្រសួង ស្ថាប័នពាក់ព័ន្ធ ក៍ដូចជាវិស័យឯកជនមួយចំនួន។ ហើយមានយុវជនជាង ២០០០ នាក់បានស្ម័គ្រចិត្តចូលរួមក្នុងព្រឹត្តិការណ៍ដ៏ធំនេះ។
បើតាមការឲ្យដឹងពីមន្រ្តីរៀបចំកម្មវិធីបានឲ្យដឹងថា ព្រឹត្តិការណ៍ “អង្គរសង្រ្កាន្ត” នេះមានគោលបំណងជំរុញឲ្យមានការចូលរួមរបស់យុវជនឲ្យបានផុសផុលក្នុងឱកាសអបអរសាទរពិធីចូលឆ្នាំថ្មីប្រពៃណីជាតិខ្មែរ ព្រមទាំងប្រមូលផ្តុំមហាជនក្នុងទ្រង់ទ្រាយធំ ដើម្បីចូលរួមផ្សព្វផ្សាយអំពីវប្បធម៌ អរិយធម៌ខ្មែរ ដែលធ្លាប់រុងរឿង ដល់ភ្ញៀវទេសចរណ៍ជាតិ និង អន្តរជាតិ។
ដោយសារមានសុខសន្តិភាព និងមានការអភិវឌ្ឍជាបន្តបន្ទាប់ ហើយបានធ្វើសមាហរណកម្មខ្លួនចូលក្នុងសហគមន៍អន្តរជាតិ ទើបប្រទេសកម្ពុជាមានឱកាសបានរៀបចំពិធីដ៏មានតម្លៃនេះ ដែលជាប្រយោជន៍របស់ជាតិទាំងមូល៕
