សមត្ថកិច្ចបង្ហាញមុខឃាតករដែលចាក់សម្លាប់យុវជនម្នាក់នៅក្រុងតាខ្មៅ
សារព័ត៌មាន Cambodia News/
កណ្តាល (០៣ កក្កដា ២០១៧) ៖ សមត្ថកិច្ចនគរបាលខេត្តកណ្តាល បានបង្ហាញមុខជនសង្ស័យដែលជាឃាតករសម្លាប់ជនរងគ្រោះនៅក្រុងតាខ្មៅ ខណៈដែលករណីឃាតកម្មចាក់សម្លាប់យុវជនម្នាក់នោះ ធ្វើឡើងនៅក្នុងបន្ទប់ទឹកផ្ទះល្វែងមួយកន្លែង ស្ថិតនៅក្នុងភូមិតាខ្មៅ១ សង្កាត់តាខ្មៅ ក្រុងតាខ្មៅ ខេត្តកណ្តាល។ ជនរងគ្រោះត្រូវបានសមត្ថកិច្ចបញ្ជាក់ថា មានឈ្មោះ ខា ស្នាក់នៅកន្លែងកើតហេតុ ហើយមានស្រុកកំណើត នៅស្រុកគងពិសី ខេត្តកំពង់ស្ពឺ។
គួរបញ្ញាក់ថា ករណីឃាតកម្មនេះ កើតឡើងនៅម៉ោងប្រមាណជា ៥ និង១៥នាទីរសៀលថ្ងៃទី០២ ខែកក្កដានេះ ដោយដំបូងឡើយជនល្មើស បានចូលក្នុងបន្ទប់ទឹក ហើយចេញវិញដោយនិយាយថា បន្ទប់ទឹកស្ទះឲ្យយុវជនរងគ្រោះចូលទៅមើល ស្រាប់តែចូលក្នុងបន្ទប់ទឹក ឮសំឡេងប្រតាយប្រតប់ក្នុងបន្ទប់ទឹក រួចជនល្មើសក៏ចេញពីបន្ទប់មកវិញ ហើយប្រាប់យុវជនជាសាក្សីថា ជនរងគ្រោះដួលបោកក្បាល បែកឈាមយកក្រណាត់ជូនឲ្យគេផង ដោយដៃរបស់ ជនល្មើសមានជាប់នឹងកាំបិតផងដែរ។ ឃើញបែបនេះ យុវជនដែលជាសាក្សី បានរត់ចេញពីកន្លែងកើតហេតុ និងបានរាយការណ៍ពីហេតុការណ៍នេះជូនសមត្ថកិច្ច៕
