សម្តេចតេជោ ៖ CPP នៅតែបន្តក្នុងឈ្នះឆ្នោតជ្រើសតាំងតំណាងរាស្ត្រនីតិកាលទី០៦ នា ខែកក្កដា ឆ្នាំ២០១៨ ខាងមុខ
សារព័ត៌មាន Cambodia News/
ភ្នំពេញ (២៦ មិថុនា ២០១៧) ៖ នៅក្នុងពិធីប្រគល់វិញ្ញាបនបត្រដល់សិស្សសាលាភូមិន្ទរដ្ឋបាល នៅវិទ្យាស្ថានជាតិអប់រំ នាថ្ងៃទី ២៦ មិថុនា ២០១៧ សម្តេចតេជោ ហ៊ុន សែន បានថ្លែងអំណរគុណដ៏ជ្រាលជ្រៅបំផុត ចំពោះសមាជិក សមាជិកាគណបក្ស និងជនរួមជាតិនៅទូទាំងប្រទេស ដែលបានគាំទ្រ និងបានបោះឆ្នោតឱ្យគណបក្សប្រជាជន ដើម្បីថែរក្សាការពារសន្តិភាព និងបន្តការអភិវឌ្ឍន៍ប្រទេសជាតិ ឱ្យកាន់តែរីកចម្រើនទៅមុខទៀត។
សម្តេចតេជោបានបញ្ជាក់ថា «គណបក្សប្រជាជនកម្ពុជា គឺនៅតែជាគណបក្សជាទីទុកចិត្តរបស់ប្រជាជននាំមុខដ៏រឹងមាំបំផុតនៅកម្ពុជា។ ជ័យជំនះ នៅពេលនេះ គឺបានបង្ហាញឱ្យឃើញកាន់តែច្បាស់បំផុតថា នៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី០៦ នា ខែកក្កដា ឆ្នាំ២០១៨ ខាងមុខនេះគឺ គណបក្សប្រជាជន កម្ពុជានឹងទទួលនូវជ័យជំនះជាបន្តទៀតជាក់ជាមិនខាន»។
សម្តេចតេជោបានបន្តទៀតថា លទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ ឆ្នាំ២០១៧ ដែលលទ្ធផលជាផ្លូវការ គឺបានបញ្ជាក់ច្បាស់ថា «គណបក្សប្រជាជនកម្ពុជា» គឺជាគណបក្សឈ្នះឆ្នោតនៅក្នុងការបោះឆ្នោតខាងលើនេះ។គណបក្សប្រជាជនកម្ពុជាទទួលបានចៅសង្កាត់-មេឃុំ ចំនួន១,១៥៦ ដែលលើសជាង២ ភាគ៣ នៃឃុំ-សង្កាត់ នៅទូទាំងប្រទេស។ លទ្ធផលផ្លូវការនេះ គឺបានបង្ហាញអោយឃើញកាន់តែច្បាស់ថា ប្រជាពលរដ្ឋ និង យុវជនបានគាំទ្រ និងបោះឆ្នោតអោយគណបក្សប្រជាជនយ៉ាងច្រើនលើសលប់បំផុត៕
