ក្រសួងព័ត៌មានបញ្ជាឲ្យវិទ្យុ ១០២ និងវិទ្យុសំបុកឃ្មុំ ឈប់ចាក់ផ្សាយបន្តព័ត៌មានពីអាស៊ីសេរីនិងវីអូអេ
សារព័ត៌មាន Cambodia News/
ភ្នំពេញ (០៤ កញ្ញា ២០១៧) ៖ ក្រសួងព័ត៌មាននៅថ្ងៃអាទិត្យ ទី៣ កញ្ញា នេះ ចេញបញ្ជាឲ្យម្ចាស់ស្ថានីយវិទ្យុក្នុងស្រុកចំនួន២ គឺវិទ្យុស្ត្រីអេហ្វអឹម (FM) ១០២ និងវិទ្យុសំបុកឃ្មុំ FM១០៥ ឈប់ចាក់ផ្សាយបន្តព័ត៌មាន អាស៊ីសេរីនិងវីអូអេហើយក្នុងករណីនៅតែបន្តចាក់ផ្សាយក្រសួងនឹងដកអាជ្ញាប័ណ្ណបញ្ឈប់ការផ្សាយ។
លិខិតរបស់រដ្ឋមន្ត្រីក្រសួងព័ត៌មានលោក ខៀវ កាញារីទ្ធ ចុះថ្ងៃទី៣ កញ្ញា ថា ការបញ្ជាឲ្យវិទ្យុទាំងពីរនេះឈប់ចាក់ផ្សាយព័ត៌មានពីអាស៊ីសេរី និងវីអូអេ ក្រោមហេតុផលថា វិទ្យុបរទេសទាំងនេះ ពុំទាន់បានចុះបញ្ជីការិយាល័យតំណាងស្របច្បាប់នៅក្រសួងព័ត៌មាននៅឡើយ។
ម្ចាស់ស្ថានីយវិទ្យុទាំងពីរគឺ លោក ម៉ម សូណង់ដូ និងអ្នកស្រី ជា ស៊ុនដាណែត បានបញ្ជាក់ប្រាប់អាស៊ីសេរីនៅថ្ងៃទី៣ កញ្ញាថា វិទ្យុអេហ្វអឹម ១០២ និងអេហ្វអឹម ១០៥ នឹងលែងចាក់ផ្សាយបន្តពីអាស៊ីសេរី និងវីអូអេ ក្រោយទទួលលិខិតពីក្រសួង៕
