តំណែងជាប្រធានតំណាងភាគតិចនៅក្នុងសភា លោក កឹម សុខា នឹងអស់តួនាទីនៅថ្ងៃ៣១ មករា
សារព័ត៌មាន Cambodia News/
ភ្នំពេញ (២៤ មករា ២០១៧) ៖ គណៈកម្មាធិការអចិន្ត្រៃយ៍រដ្ឋសភា បានសម្រេចដាក់បញ្ចូលរបៀបវារៈវិសោធនកម្មបទបញ្ហាផ្ទៃក្នុងរដ្ឋសភាប្រការ៤៨ថ្មី(បី) នៅក្នុងសម័យប្រជុំវិសាមញ្ញពេញអង្គនៅថ្ងៃទី៣១ ខែមករា ខាងមុខនេះដើម្បីសម្រេចលុបតួនាទីប្រធានក្រុមអ្នកតំណាងរាស្ត្រភាគច្រើន និងភាគតិចក្នុងរដ្ឋសភា ។
ការប្រជុំធ្វើវិសោធនកម្មបទបញ្ជាផ្ទៃក្នុងរដ្ឋសភាប្រការ៤៨ថ្មី(បី) នឹងត្រូវលុបចោលតួនាទីប្រធានក្រុមអ្នកតំណាងរាស្ត្រភាគច្រើនរបស់គណបក្សប្រជាជនកម្ពុជា និងភាគតិចរបស់គណបក្សសង្គ្រោះជាតិ ។ នេះបើតាមលោក ឈាង វុន អ្នកនាំពាក្យរដ្ឋសភា ប្រាប់ក្រុមអ្នកសារព័ត៌មាន ក្រោយពីកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ដឹកនាំដោយសម្តេចពញាចក្រី ហេង សំរិន ប្រធានរដ្ឋសភា នាព្រឹកថ្ងៃទី២៣ ខែមករា ។
លោកបញ្ជាក់ថា «សមាជិកអចិន្ត្រៃយ៍មកពីគណបក្សប្រជាជនកម្ពុជាចំនួន១០រូប បានលើកដៃអនុម័តសម្រេចដាក់របៀបវារៈបទបញ្ជាផ្ទៃក្នុងរដ្ឋសភាប្រការ៤៨ថ្មី(បី) ក្នុងសម័យប្រជុំវិសាមញ្ញពេញអង្គនៅពេលខាងមុខនេះ ។ ដោយសារប្រធានគណៈកម្មការមួយចំនួនមកពីគណបក្សសង្គ្រោះជាតិមិនចូលប្រជុំ ដូច្នេះតាមគោលការណ៍គឺអនុប្រធានជំនួស ហើយយើងបានឯកភាពគ្នាដោយមតិ១០ទល់មតិ២ ថា ត្រូវតែធ្វើវិសោធនកម្មប្រការ៤៨ថ្មី(បី) នៃបទបញ្ជាផ្ទៃក្នុងរដ្ឋសភានេះ» ។
លោក ឈាង វុន ថ្លែងទៀតថា ក្នុងបទបញ្ជាផ្ទៃក្នុងនោះ ត្រូវបានសម្តេចតេជោ ហ៊ុន សែន ផ្តូចផ្តើមឲ្យលោក សម រង្ស៊ី មានឋានៈស្មើនាយករដ្ឋមន្ត្រី ក្នុងយន្តការវប្បធម៌សន្ទនា ដែលកម្ពុជាមិនធ្លាប់មានពីមុនមក ។ ជាងនេះយន្តការនោះក៏បានលើកលោក កឹម សុខា ជាអនុប្រធានទី១រដ្ឋសភា ។ ចំណែកលោក សម រង្ស៊ី ក៏ត្រូវធ្វើជាប្រធានក្រុមតំណាងរាស្ត្រភាគតិចនៅក្នុងរដ្ឋសភា ដែលមានតួនាទីស្មើនាយករដ្ឋមន្ត្រី និងធំជាងលោក កឹម សុខា ។
លោក ឈាង វុន បន្តថា បន្ទាប់ពីបង្កើតយន្តការនេះ ទាំងលោក សម រង្ស៊ី និងលោក កឹម សុខា មិនបានគោរពតាមយន្តការនេះទេ ពោលគឺភាពស្មោះត្រង់ក៏គ្មានដែរ ។ លោកថា មូលហេតុធ្វើវិសោធនកម្មបទបញ្ជានេះ ដោយសារតែគណបក្សសង្គ្រោះជាតិ ចេះតែយកតួនាទីជាប្រធានក្រុមអ្នកតំណាងរាស្ត្រភាគតិចក្នុងការចរចាជាមួយប្រធានក្រុមភាគច្រើន រឿង លើកលែងអ្នកទោសកំពុងជាប់ពន្ធនាគារ ដែលខុសនឹងគោលការណ៍ច្បាប់ ពិសេសនោះធ្វើឲ្យប៉ះពាល់ដល់អំណាចតុលាការ ។ សម្រាប់ការធ្វើវិសោធនកម្មច្បាប់អ្វីមួយ មានតែសមាជិកសភា១ភាគ៤នោះ អាចសុំធ្វើវិសោធនកម្មបានហើយ ៕
