រថយន្តដឹកកម្មករក្រឡាប់ទាំងព្រឹក រងរបួសធ្ងន់ស្រាល ៣២នាក់
សារព័ត៌មាន Cambodia News/
កំពង់ស្ពឺ (២៣ មករា ២០១៧) ៖ យ៉ាងហោចណាស់កម្មករកម្មាការីចំនួន៣២នាក់ បានរងរបួសស្រាល ខណៈដែលរថយន្តដឹកកម្មករ បានក្រឡាប់ផ្ងាជើងទាំងព្រឹក ថ្ងៃទី២៣ ខែមករា ឆ្នាំ២០១៧ នៅចំណុចភូមិកែវមុន្នី ឃុំសំរោងទង ស្រុកសំរោងទង។
លោកវរៈសេនីយ៍ឯក សាយ សេត ទទួលបន្ទុកផ្នែកចរាចរណ៍ស្រុកសំរោងទង បានឲ្យដឹងថា ករណីរថយន្តកូរេដឹកកម្មករក្រឡាប់ខាងលើនេះ ពណ៌ស ពាក់ស្លាកលេខ ភ្នំពេញ2AB-3413 ដោយសារបញ្ហាបច្ចេកទេសគាំងចង្កូតរថយន្ត ខណៈរថយន្តបង្កកំពុងជែងគ្នាជាមួយរថយន្តផ្សេងទៀតនោះ ទើបបណ្តាលឲ្យវ៉េក្រឡាប់តែម្តង។
លោកបានបន្តថា ចំណែកកម្មកររងគ្រោះសរុបមានចំនួន៣២នាក់ រួមទាំងតៃកុងឡានម្នាក់ និងមានអ្នករងរបួសធ្ងន់ចំនួន ៦នាក់។ ក្រោយពេលកើតហេតុភ្លាមៗ គេបានបញ្ជូនជនរងគ្រោះ ទៅសង្គ្រោះបន្ទាន់នៅមន្ទីរពេទ្យ៕
