រដ្ឋាភិបាលសម្រេចលុបចោលថ្លៃសេវាកម្មលិខិតបញ្ជាក់អត្តសញ្ញាណ
សារព័ត៌មាន Cambodia News/
ភ្នំពេញ (១២ មករា ២០១៧) ៖ រាល់សេវាកម្មរបស់អជ្ញាធរមូលដ្ឋានដែលទាក់ទងនឹងការធ្វើសំបុត្រអាពាហ៍ ពិពាហ៍រវាងជនបរទេស និងប្រជាពលរដ្ឋខ្មែរ ការផ្តល់សៀវភៅស្នាក់នៅ ការផ្តល់ទុតិយតាសៀវភៅស្នាក់នៅឬការផ្តល់សៀវភៅស្នាក់នៅឡើងវិញ ការស្នើសុំបន្ថែម ឬបន្ថយសមាជិកក្នុងសៀវភៅស្នាក់នៅ ការផ្តល់សៀវភៅគ្រួសារ ការស្នើសុំបន្ថែមឬបន្ថយសមាជិកគ្រួសារក្នុងសៀវភៅគ្រួសារ ការផ្តល់អត្តសញ្ញាណបណ្ណសញ្ជាតិខ្មែរ (សេវាកម្មលើតម្រូវការទាំងនេះ) នឹងមិនតម្រូវឲ្យបង់ប្រាក់នោះទេ។
នេះបើយោងតាមសេចក្តីប្រកាសអន្តរក្រសួង ស្តីពីការផ្តល់សេវារដ្ឋបាលរបស់ក្រសួងមហាផ្ទៃចុះថ្ងៃទី៣០ ធ្នូ ឆ្នាំ២០១៦ដែលអ្នកសារព័ត៌មានទើបទទួលបាននៅថ្ងៃពុធទី១១ មករានេះ។
ការផ្តល់សេវាកម្មទាំងប៉ុន្មានខាងលើតម្រូវឲ្យបង់ប្រាក់ដល់អាជ្ញាធរឃុំសង្កាត់ ឬអជ្ញាធរប៉ូលីសមូលដ្ឋានចាប់ពី៣០០០រៀល ដល់១០.០០០រៀល នៅមុនពេលសេចក្តីប្រកាសនេះត្រូវដាក់ឲ្យអនុវត្ត។
ទោះជាយ៉ាងណានៅក្នុងសេចក្តីប្រកាសរបស់ខ្លួនក្រសួងមហាផ្ទៃបានបញ្ជាក់ថា ខ្លួននឹងទទួលយកពាក្យបណ្តឹងរបស់ប្រជាពលរដ្ឋ ក្នុងករណីមានការអនុវត្តន៍ខុសពីការចែងក្នុងសេចក្តីប្រកាសខាងលើដូចជាមានការយកកម្រៃសេវាលើសការកំណត់ ឬមានការយឺតយ៉ាវហួសរយៈពេលអតិបរមាជាដើម៕
