សូមកុំភ្ញាក់ផ្អើល នឹងការចល័តសព្វាវុធយោធា ក្នុងរាជធានីភ្នំពេញ
សារព័ត៌មាន Cambodia News/
ភ្នំពេញ (០៥ មករា ២០១៧) ៖ នៅវេលាម៉ោង២រំលងអាធ្រាត ថ្ងៃទី០៥ ខែមករា ឆ្នាំ២០១៧ នឹងមានការដឹកជញ្ជូនសម្ភារយោធភណ្ឌមួយចំនួន របស់កងយោធពលខេមរភូមិន្ទ កាត់តាមរាជធានីភ្នំពេញ ចូលទៅមជ្ឈមណ្ឌលសន្និបាត និងពិព័រណ៌កោះពេជ្រ ហើយសម្ភារយោធភណ្ឌនេះ នឹងត្រូវដឹកត្រឡប់ចេញបន្ទាយវិញ នៅវេលាម៉ោង២រំលងអាត្រាធ្រ នាថ្ងៃទី០៩ ខែមករា ឆ្នាំ២០១៧។ នេះបើយោងតាមសេចក្តីជួនដំណឹងរបស់រដ្ឋបាលរាជធានីភ្នំពេញ នៅថ្ងៃទី០៤ ខែមករា ឆ្នាំ២០១៧។
សេចក្ដីជូនដំណឹងបានបញ្ជាក់ថា ការដឹកជញ្ជូនសម្ភារយោធភណ្ឌទាំងនេះ គឺដើម្បីរៀបចំកម្មវិធីប្រកួតកីឡាកងយោធពលខេមរភូមិន្ទ ដែលរៀបចំដោយគណៈកម្មាធិការ រៀបចំកីឡាកងយោធពលខេមរភូមិន្ទ អបអរសាទរទិវាជ័យជម្នះ៧មករា នៅមជ្ឈមណ្ឌលសន្និបាត និងពិព័រណ៌កោះពេជ្រ ចាប់ពីថ្ងទី៦ ដល់ទី៨ ខែមករា ឆ្នាំ២០១៧។
សេចក្ដីជូនដំណឹងបានបន្តថា សម្ភារយោធភណ្ឌទាំងនោះ រួមមាន៖ រថពាសដែកចំនួន២គ្រឿង និងរថយន្តយោធាចំនួន១៥គ្រឿង ដែលដឹកជញ្ជូនដោយកងពលតូច អន្តរាគមន៍លេខ៧០ ឆ្លងកាត់តាមកំណាត់ផ្លូវជាតិលេខ៣ ផ្លួវវេងស្រេង មហាវិថីមុនីរ៉េត មហាវិថីម៉ៅសេទុង និងមហាវិថីព្រះសុធារស៕
