បញ្ហាតិចតួចនៃប្រព័ន្ធរំលាយអាហារ ៖ បំពង់ក ថ្លើម ប្រមាត់ លំពែង ពោះវៀនតូច និងពោះវៀនធំ អាចនាំឲ្យមានជំងឺមហារីកធ្ងន់ធ្ងរ
ដោយ Cambodia News
ភ្នំពេញ៖ លោក ស៊ី ខេ លាវ (C K Leow) វេជ្ជបណ្ឌិតឯកទេសជាន់ខ្ពស់ និងជាវេជ្ជបណ្ឌិតព្យាបាលនិងវះកាត់ជំនាញផ្នែកប្រព័ន្ធរំលាយអាហារជនជាតិសឹង្ហបុរីបាននិយាយប្រាប់អ្នកសារព័ត៌មាននៅថ្ងៃទី១១ ធ្នូ នេះមុនលោកចាកចេញពីរាជធានីភ្នំពេញថា ពលរដ្ឋកម្ពុជាត្រូវតែយកចិត្តទុកដាក់ឲ្យបានខ្ពស់ពីប្រព័ន្ធរំលាយអាហារដែលក្នុងនោះមានបំពង់ក ថ្លើម ប្រមាត់ លំពែង ពោះវៀនតូច និងពោះវៀនធំ ព្រោះវាអាចនំាឲ្យមានជំងឺមហារីកធ្ងន់ធ្ងរ និងបាត់បង់ជីវិត។
លោក ស៊ី ខេ លាវ ធ្លាប់មកប្រទេសកម្ពុជាកាលពីឆ្នាំ២០០៥ ក្នុងដំណើរទស្សនកិច្ចមនុស្សធម៌ ហើយលោកបានដឹងថា ប្រទេសនេះគឺមានប្រជាជនជាច្រើនមានបញ្ហាប្រព័ន្ធរំលាយអាហារតាំងពីលើរហូតដល់ក្រោម ពោលគឺគិតចាប់ពីកន្លែងដែលអាហារចូល និងកន្លែងដែលកាកសំណល់អាហារចេញ។
នៅឯមន្ទីរពេទ្យក្នុងប្រទេសសិង្ហបុរី លោក លាវ បានពិគ្រោះយោបល់ និងព្យបាលជំងឺប្រព័ន្ធរំលាយអាហារដល់ជនជាតិកម្ពុជា ម៉ាឡេស៊ី ហ្វីលីពីន ឥណ្ឌូនេស៊ី និងវៀតណាម ហើយនៅទីនោះមានការចំណាយច្រើនដោយលោកលើកឧទាហរណ៍ថា ក្រៅពីថ្លៃពិគ្រោះយោបល់ និងព្យាបាលជំងឺ អ្នកជំងឺនិងអ្នករួមដំណើរត្រូវចំណាយលើសំបុត្រយន្តហោះ សណ្ឋាគារ ការធ្វើដំណើរ និងការហូបចុកអស់រាប់ពាន់ដុល្លារអាម៉េរិកក្នុងរយៈពេលតែពីរបីថ្ងៃប៉ុណ្ណោះ។
ថ្លែងប្រាប់អ្នកសារព័ត៌មានមុនលោកចាកចេញពីប្រទេសកម្ពុជានាថ្ងៃអាទិត្យ លោក លាវ បាននិយាយថា “ឥឡូវ ដើម្បីសម្រួលដល់ប្រជាជនកម្ពុជា ខ្ញុំបានមកពិគ្រោះយោបល់ និងព្យាបាលផ្នែកប្រព័ន្ធរំលាយអាហារនេះនៅកម្ពុជាជាទៀងទាត់ប្រចាំខែ ដោយសហការជាមួយមន្ទីរពហុព្យាបាលអន្តរជាតិខេមា (KHEMA International Polyclinic) បឹងកេងកង រាជធានីភ្នំពេញ ព្រោះមន្ទីរពហុព្យាបាលអន្តរជាតិខេមានេះ មានឧបករណ៍ស្តង់ដារគ្រប់គ្រាន់ គួរឲ្យទុកចិត្តបាន និងគ្រូពេទ្យមានវិជ្ជាជីវៈ ដូចនៅប្រទេសរបស់ខ្ញុំដែរ ដែលអាចឲ្យខ្ញុំវះកាត់នៅទីនេះបាន”។
លោក លាវ បានរម្លឹកថា បញ្ហាតូចនៃប្រព័ន្ធរំលាយអាហារមានដូចជាបំពង់ក ថ្លើម ប្រមាត់ លំពែង ពោះវៀនតូច និងពោះវៀនធំអាចទៅជាបញ្ហាធំ ដោយក្លាយជាជំងឺមហារីកធ្ងន់ធ្ងរ ហេតុនេះបុគ្គលគ្រប់រូបត្រូវមកពិគ្រោះយោបល់ជាមួយគ្រូពេទ្យឯកទេសឲ្យបានពីដំបូង ដើម្បីព្យាបាលឲ្យទាន់ពេល។
សូមបញ្ជាក់ថា លោក លាវ បានសិក្សាទាំងនៅប្រទេសអង់គ្លេសនិងសិង្ហបុរី ហើយក្លាយជាគ្រូពេទ្យឯកទេសវះកាត់ទូទៅ ដោយឡែកខាងផ្នែកប្រព័ន្ធរំលាយអាហារ។ លោកក៏ធ្លាប់បានស្រាវជ្រាវផ្នែកវេជ្ជសាស្រ្ត ធ្លាប់បានបង្រៀន និងព្យាបាលជំងឺប្រព័ន្ធរំលាយអាហារនៅប្រទេសអង់គ្លេស សិង្ហបុរី និងហុងកុង ដែលមានអ្នកជំងឺគ្រប់ជាតិសាសន៍ ទៅពិគ្រោះយបល់និងព្យាបាលទាំងប្រើប្រាស់ឱសថ និងវះកាត់។
នៅកម្ពុជា លោកវេជ្ជបណ្ឌិត លាវ នឹងមក៣ថ្ងៃក្នុងមួយខែ ដើម្បីផ្តល់ការពិគ្រោះ ពិនិត្យ ធ្វើរោគវិនិច្ឆ័យ និងព្យាបាលជំងឺប្រព័ន្ធរំលាយអាហារទៅតាមស្ថានភាពនៃជំងឺនៅឯមន្ទីរពហុព្យាបាលអន្តរជាតិខេមាបឹងកេងកង ដោយលោកអះអាងថា តម្លៃពិតជាខុសគ្នានៅប្រទេសសិង្ហបុរី ខណៈដែលមានគ្រូពេទ្យឯកទេសដូចគ្នា។
សម្រាប់ការណាត់ជួបលោកវេជ្ជបណ្ឌិត ស៊ី ខេ លាវ អ្នកមានបញ្ហាផ្នែកប្រព័ន្ធរំលាយអាហារអាចទាក់ទងលោកវេជ្ជបណ្ឌិត អ៊ុំ សុភាព នាយកគ្រប់គ្រងមន្ទីរពហុព្យាបាលអន្តរជាតិខេមាបឹងកេងកង ស្ថិតនៅដីឡូត៍លេខ ២៨ ផ្លូវ ២៩៤ សង្កាត់បឹងកេងកង ១ ខណ្ឌចំការមន រាជធានីភ្នំពេញ ឬតាមទូរស័ព្ទលេខ ០១៧ ៥៨៨ ៥៨៨ និង ០៩៩ ៥៨៨ ៥៨៨។
លោកវេជ្ជបណ្ឌិត អ៊ុំ សុភាព បាននិយាយថា ការពិគ្រោះយោបល់ឲ្យដឹងមុនគឺជាឱកាសមាសដើម្បីចៀវវាងកុំឲ្យប្រព័ន្ធរំលាយអាហារមានបញ្ហាតិចតួចក្លាយជាជំងឺធ្ងន់ធ្ងរ ដែលមិនអាចព្យាបាលបាន។
ទាំងលោកវេជ្ជបណ្ឌិត អ៊ុំ សុភាព និងលោកវេជ្ជបណ្ឌិត ស៊ី ខេ លាវ បាននិយាយដូចគ្នាថា សូមកុំរង់ចាំឲ្យបញ្ហាតូចក្លាយជាធំ តែត្រូវមកពិគ្រោះយោបល់ឲ្យបានទាន់ពេលវេលា។
អ្នកស្រី ហេង ជឿន វ័យ៧៧ ឆ្នាំ រស់នៅរាជធានីភ្នំពេញដែលបានមកពិគ្រោះយោបល់ជាមួយលោកវេជ្ជបណ្ឌិត ស៊ី ខេ លាវ បានប្រាប់អ្នកសារព័ត៌មានថា ការមានគ្រូពេទ្យជំនាញសាំងហ្ការពួរនៅកម្ពុជាពិតជាងាយស្រួល ព្រោះកន្លងមកគាត់ទៅព្យាបាលនៅបរទេសដោយចំណាយប្រាក់ច្រើន ហើយមានការភ័យព្រួយក្នុងការជិះយន្តហោះ។
អ្នកស្រីបានបញ្ជាក់ថា ក្រោយពីស្តាប់ការពិគ្រោះយោបល់ជាមួយលោកវេជ្ជបណ្ឌិត លាវ មក គឺគាត់មានទំនុកចិត្ត ហើយទទួលបានវេជ្ជបញ្ជាត្រឹមត្រូវសម្រាប់ឱសថព្យាបាល និងចំណាយប្រាក់តិចជាងនៅបរទេស។
សូមរម្លឹកដែរថា មន្ទីរពហុព្យាបាលអន្តរជាតិខេមាបឹងកេងកង ក៏មានវេជ្ជបណ្ឌិតឯកទេសសិង្ហបូរីមួយក្រុមរួមគ្នាជាមួយគ្រូពេទ្យកម្ពុជា ដើម្បីជួយបង្ការ និងព្យាបាលជំងឺមហារីកទូទៅ ដូចជាមហារីកសុដន់ មហារីកស្បូន ដៃស្បូន មហារីកសួត មហារីកថ្លើម មហារីកក្រពះ និងពោះវៀនធំជាដើម ព្រមទាំងជំងឺបេះដូងនៅក្នុងប្រទេសកម្ពុជា។
មន្ទីរពហុព្យាបាលនេះមានផ្តល់សេវាជាច្រើនដូចជា មណ្ឌលរោគវិនិច្ឆ័យ (Diagnostic Center) ផ្នែកជំងឺទូទៅ ផ្នែកសម្ភព និងរោគស្រ្តី ផ្នែកជំងឺកុមារ (ពិសេសចំពោះកុមារមានវិបត្តិនៃការនិយាយ ឬការលូតលាស់ខុសធម្មតា និងវិបត្តិផ្លូវចិត្ត) ផ្នែកជំងឺប្រព័ន្ធរំលាយអាហារ និងឫសដូងបាត ផ្នែកជំងឺរ៉ាំរ៉ៃ (ដូចជាទឹកនោមផ្អែម ជំងឺផ្លូវដង្ហើម ជំងឺបេះដូង និងសរសៃឈាម) ផ្នែកជំងឺឆ្អឹង និងសន្លាក់ (បាក់ឆ្អឹង ខូចក្បាលឆ្នឹងត្រកៀក និងជង្គង់) ផ្នែកជំងឺប្រព័ន្ធសរសៃប្រសាទ (ស្ទះ និងដាច់សរសៃឈាមខួរក្បាល និងជំងឺឆ្អឹងខ្នង) ផ្នែកជំងឺឆ្លងដូចជារលាកថ្លើមបេ និងរលាកថ្លើមបេសេ មណ្ឌលស្តារនិតិសម្បទាវេជ្ជសាស្រ្ត (Medical Rehabilitation Center) សម្រាប់មនុស្សចាស់ខូចមួយចំហៀងខ្លួន ឬមួយកំណាត់ខ្លួន ឬទាំងមូលក្រោយស្ទះ ឬដាច់សរសៃឈាមខួរក្បាល វិបត្តិនៃការនិយាយ និងវិបត្តិផ្លូវចិត្ត ផ្នែកពិនិត្យសុខភាពចល័ត (Mobile Screening and Examination Unit) និងផ្នែកថែទាំសុខភាពតាមផ្ទះ (Homecare Unit)៕
