កញ្ញា ភីន សុដាលីស ភ្ជាប់ពាក្យថ្ងៃទី៣១មីនា ជាមួយអ្នកសិល្បះដូចគ្នា
Cambodia News
ភ្នំពេញ៖ តារាសម្តែងវ័យក្មេងរូបស្រស់ កញ្ញា ភិន សុដាលីស បានត្រៀមខ្លួនភ្ជាប់ពាក្យជាមួយអ្នកសិល្បះដូចគ្នានៅថ្ងៃទី៣១ ខែមីនា ឆ្នាំ២០១៣ខាងមុខនេះ បន្ទាប់ពីតារាសម្តែងរូបនេះបានចូលប្រឡូកក្នុងវិស័យសិល្បះបានត្រឹមមួយរយះខ្លីនោះ។
តារាសម្តែងដែលតែងតែទទួលបានតំណែងជាតួឯកស្រីគ្រប់រឿងនៅក្នុងផលិតកម្មមហាហង្សដែលមានឪពុករបស់នាងជាម្ចាស់ផលិតកម្មនោះ បានសម្រេចចិត្តភ្ជាប់ពាក្យជាមួយលោក ប៉ែន តុលា តារាសម្តែង និងបង្ហាញម៉ូតក្នុងក្រុមSun Super Model បន្ទាប់ពីអ្នកទាំងពីរបានស្វែងយល់ចិត្តគ្នាបានរយះពេលជិតមួយឆ្នាំមកនេះ។
ដំបូងឡើយគេមិនសូវជាបានចាប់អារម្មណ៍ពីទំនាក់ទំនងរបស់តារាសម្តែងទាំងពីរនេះឡើយ ហើយគេមិនក៍បានគិតដល់ថា អ្នកទាំងពីរកំពុងតែស្វែងយល់ចិត្តគ្នាទៅវិញទៅមក ផ្ទុយពីទំនាក់ទំនងត្រឹមជាមិត្តភក្តិក្នុងអាជីពសិល្បះដូចគ្នា ក្នុងពេលដែលអ្នកទាំងពីរតែងតែងតែអង្គុយកៀតកិតជាមួយគ្នាក្នុងគ្រាដែលអ្នកទាំងពីរចូលរួមក្នុងកម្មវិធីផ្សេងៗ។
ប៉ុន្តែអ្វីៗធ្វើឲ្យគេភ្ញាក់ផ្អើល បន្ទាប់ពីលិខិតអញ្ជើញភ្ជាប់ពាក្យរបស់តារាសម្តែងទាំងពីរត្រូវបានគេចែកជូនដល់មិត្តភក្តិ សាច់ញាតិជាសាធារណះដើម្បីចូលរួមជាសក្ខីភាពការភ្ជាប់និស្ស័យជាគូស្រកររវាងតារាទាំងពីរដួងនេះនៅថ្ងៃទី៣១ ខែមីនាខាងមុខ។ពិធីភ្ជាប់ពាក្យនឹងនេះនិងប្រព្រឹត្តធ្វើនៅថ្ងៃទី៣១ ខែមីនាខាងមុខវេលាម៉ោង៧ព្រឹកក្នុងគេហដ្ឋានរបស់ភិន សុដាលី នាទីក្រុងភ្នំពេញ។
លោក ហ៊ិន សុភិន ចាងហ្វាងផលិតកម្មមហាហង្ស និងជាឪពុកបង្កើតរបស់កញ្ញា ភិន សុដាលីស បានអះអាងថា កូនស្រីរបស់លោកពិតជាមានគម្រោងភ្ជាប់ពាក្យនៅចុងខែមីនានេះពិតប្រាកដមែន ហើយគម្រោងចូលរោងការជាផ្លូវការគ្រោងនឹងធ្វើនៅថ្ងៃទី១៥ ខែធ្នូ ឆ្នាំ២០១៣ខាងមុខ។ លោកបន្តថា ការសម្រេចចិត្តឲ្យកូនស្រីភ្ជាប់ពាក្យនេះ បន្ទាប់ពីភាគីទាំងសងខាងបានស្វែងយល់ចិត្តគ្នាបានយ៉ាងច្បាស់លាស់ថា អាចរស់នៅជាមួយគ្នាដោយមិនមានបញ្ហា។ លោកនិយាយថា យើងជាចាស់ទុំ គឺធ្វើអ្វីស្របទៅតាមក្មេងៗដែលស្រឡាញ់គ្នា ដោយយើងគ្រាន់តែជួយពិនិត្យមើលបន្ថែមទៀតប៉ុណ្ណោះ ប្រសិនបើវាទាំងពីរពិតជាស្រឡាញ់គ្នាមែន នោះយើងមិនជំទាស់ឡើយ។លោកបន្តថា កូនស្រីខ្ញុំមុននឹងនាងសម្រេចចិត្តភ្ជាប់ពាក្យនេះគឺនាងបានស្វែងយល់ចិត្ត តុលា ជិតមួយឆ្នាំហើយ ដោយនាងទទួលស្គាល់ថា តុលា ជាមនុស្សប្រុសពេញលក្ខណះ មានការទទួលខុសត្រូវ ហើយពួកគេបានសន្យាថា នឹងស្រឡាញ់គ្នារហូតដល់ចាស់កោងខ្នងរាងៗខ្លួន។
ពាក់ព័ន្ធក្រោយពិធីមង្គលការហើយ ភិន សុដាលីស និងបញ្ចប់អាជីពសិល្បះឬយ៉ាងណានោះ លោក ហ៊ិន សុភិន បានអះអាងថា រឿងមួយនេះលោកមិនអាចនិយាយបានទេ ព្រោះជាសិទ្ធិរបស់កូនស្រី និងអនាគតស្វាមីរបស់នាងជាអ្នកពិចារណាដោយខ្លួនឯង។ លោកបន្ថែមថា យើងបានអនុញ្ញាតឲ្យអ្នកទាំងពីរបន្តការសិក្សារហូតចប់សព្វគ្រប់ បើទោះបីជាអ្នកទាំងពីរបានរៀបការរួចហើយក៏ដោយ។លោកបញ្ជាក់ថា ការបន្តសិល្បះទៀតឬយ៉ាងណានោះគឺត្រូវចាំមើលក្រោយពេលដែលពួកគេរៀបការរួច ដោយសារតែពេលនេះការងារសិល្បះរបស់ពួកគេក៍មិនសូវជាមមាញឹកខ្លាំង ដោយផ្តោតសំខាន់តែលើការសិក្សាតែមួយមុខនោះ។
ទោះជាយ៉ាងណាលោក ហ៊ិន សុភិន មិនបានបញ្ជាក់អ្វីច្រើនពាក់ព័ន្ធនឹងការដែលលោកឲ្យកូនស្រីភ្ជាប់ពាក្យក្នុងពេលកំពុងសិក្សានេះឡើយ ដោយគ្រាន់តែនិយាយដោយខ្លីថា អ្វីៗទាំងអស់គឺលោកធ្វើទៅតាមចិត្តក្មេងៗដែលស្រឡាញ់គ្នាប៉ុណ្ណោះ។
គួបញ្ជាក់ថា ភិន សុដាលីស បានប្រឡូកក្នុងសិល្បះក្នុងរយះពេលខ្លីប៉ុណ្ណោះ ប៉ុន្តែកេរ្តិ៍ឈ្មោះរបស់នាងបានហក់ឡើងគួឲ្យចាប់អារម្មណ៍ បន្ទាប់ពីនាងបានគ្រោងតម្តែងជាតួឯកជាបន្តបន្ទាប់ក្នុងខ្សែវីដេអូភាគចាក់ផ្សាយតាមទូរទស្សន៍ដែលត្រូវបានផលិតឡើងដោយផលិតកម្មមហាងហង្សដែលមានឪពុករបស់នាងជាថៅកែនោះ។
ក្រោយពីចាប់ផ្តើមល្បីឈ្មោះនោះតារាសម្តែងរាងតួចច្រឡឹងសាច់សខ្ចីរូបនេះក៍បានពើបប្រទះនូវរឿងរ៉ាវស្នេហាជាបន្តបន្ទាប់ផងដែរ ប៉ុន្តែជារឿយៗតារាវ័យក្មេងរូបនេះបានចេញមកធ្វើការបដិសេធ ។
ទោះជាយ៉ាងណាបញ្ហាអាប់អួរពាក់ព័ន្ធនិងជីវិតឯកជនរបស់តារាសម្តែងវ័យក្មេង ភិន សុដាលីស នឹងត្រូវបានរសាត់បាត់ពីការសង្ស័យរបស់មហាជនខាងក្រៅ បន្ទាប់ពីនាងបានសម្រេចចិត្តភ្ជាប់ពាក្យជាផ្លូវការជាមួយអ្នកសិល្បះដូចគ្នានាពេលនេះ ៕ ស.រ
