អ្នកកាសែតជើងចាស់ លោក សេក បរិសុទ្ធ បាត់បង់ជីវិតដោយជួបគ្រោះថ្នាក់ចរាចរណ៍
សារព័ត៌មាន Cambodia News/
ក្រចេះ (១៧ តុលា ២០១៦) ៖ កាលពីរសៀលថ្ងៃទី១៦ ខែតុលា លោកសេក បរិសុទ្ធ ដែលជាអ្នកកាសែតជើងចាស់ នឹងជាអ្នក ដែលមានបទពិសោធន៍ខ្ពស់ ហើយពូកែភាសាអង់គ្លេស បានទទួលមរណភាពដោយជួបគ្រោះថ្នាក់ក្រឡាប់រថយន្តនៅស្រុកសំបូរ ខេត្តក្រចេះ។
លោក សេក បរិសុទ្ធ មានអាយុ៥០ឆ្នាំ រួមជាមួយបុគ្គលិក២នាក់ទៀតក្នុងអង្គការ AEAរបស់លោកបានធ្វើដំណើរទៅបំពេញបេសកកម្មការងារខេត្តរតនគិរីតាមរថយន្តម៉ាកហ្វតពណ៌មាសពាក់ស្លាកលេខ OMG442002 ស្រាប់តែដល់ស្រុកសំបូរ ខេត្តក្រចេះក៏ជួបគ្រោះអកុសលតែម្តង។
ប៉ូលិសបានអោយដឹងថា ពេលរថយន្តម៉ាកហ្វតរបស់អង្គការ AEA ធ្វើដំណើរពីទិសត្បូងទៅជើងដល់ចំណុចកើតហេតុក៏គេចក្មេងរត់ឆ្លងកាត់ផ្លូវនាំអោយក្រឡាប់ បណ្តាលឲ្យលោក សេក បរិសុទ្ធ ដែលអង្គុយនៅខាងមុខជាប់ជាមួយតៃកុង គៀបជាប់ជាមួយរថយន្ត ស្លាប់ភ្លាមៗតែម្តង។ ដោយឡែកជនរងគ្រោះ២នាក់ទៀត មានស្រីម្នាក់អង្គុយពីក្រោយ បានរងរបួសធ្ងន់ស្រាល៕
