ប្រតិកម្មអន្តរជាតិចំពោះមរណភាពអតីតនាយករដ្ឋមន្រ្តីអង់គ្លេស Margaret Thatcher
គេបានដឹងរួចមកហើយថា «ស្ត្រីដែកថែប» គឺជានាមដែលគេបានដាក់អោយអតីតនាយករដ្ឋមន្ត្រីអង់គ្លេស គឺលោកស្រី Margaret Thatcher ដែលទើបបានទទួលមរណភាព កាលពីថ្ងៃចន្ទម្សិលមិញ ក្នុងជន្មាយុ ៨៧ ឆ្នាំ ដោយគ្រោះថ្នាក់ដាច់សរសៃឈាមក្នុងខួរក្បាល។ ក្នុងកិច្ចការដឹកនាំអង់គ្លេសពីឆ្នាំ១៩៧៩ ដល់ឆ្នាំ ១៩៩០ របស់លោកស្រី គេកត់សំគាល់ថា លោកស្រីជាអ្នកនយោបាយមួយរូបដែលមិនងាយអត់ឧនអធ្យាស្រ័យនោះឡើយ ទាំងក្នុងកិច្ចការជាតិ ទាំងក្នុងកិច្ចការអន្តរជាតិ។
ទាំង អ្នកដែលបង្អាប់រិះគន់លោកស្រី Margaret Thatcher ក៏ដូចជាអ្នកគាំទ្រនានារបស់លោកស្រី គ្រប់ៗគ្នាសុទ្ធតែបានដាក់នាមអោយលោកស្រីថាជា “ស្ត្រីដែកថែប”។ ពិភពលោកបានចាប់អារម្មណ៍ការដឹកនាំរបស់លោកស្រី Margaret Thatcher នៅអង់គ្លេស តាំងតែពីពេលដំបូង នៅពេលដែលលោកស្រីឡើងកាន់តំណែងជាស្ត្រីនាយករដ្ឋមន្ត្រីទីមួយ នៅអង់គ្លេសមកម្ល៉េះ។
គឺគេកត់សំគាល់លើការសំរេចចិត្តដ៏មោះមុតរបស់លោកស្រី ក្នុងឆ្នាំ ១៩៨២ ក្នុង ការដាក់ទ័ពជើងទឹកអង់គ្លេសដោះស្រាយវិបត្តិជម្លោះប្រជុំកោះ Malouines ប្រឆាំងទៅនឹង ប្រទេស Argentine។ គួររំលឹកថា នៅពេលនោះ ឧត្តមសេនីយនានាបានសំរេចកាន់កាប់ប្រជុំកោះ Malouines ដែលជាកោះជម្លោះរវាងប្រទេស Argentine និងអង់គ្លេស។ ការប្រឈមមុខយោធារវាងប្រទេសទាំងពីរបានបង្កអោយកងទ័ពទាំងពីរភាគី ស្លាប់អស់ជាច្រើនរយនាក់។
សហរដ្ឋអាមេរិកនៅពេលនោះគឺមានទំនោរទៅខាងប្រទេសArgentine។ ប៉ុន្តែ នៅទីបំផុត ប្រធានាធិបតី Ronald Reagan បានសំរេចចិត្តផ្តល់ជាជំនួយពស្តុភារដល់អង់គ្លេសវិញ។ ម្យ៉ាងទៀត លោកស្រី Margaret Thatcher និងលោក Ronald Reagan ក៏មានការយល់ឃើញនយោបាយស្របគ្នាផងដែរ គឺថាអ្នកដឹកនាំទាំងពីររូបនេះមានជំហរប្រឆាំងលទ្ធិ កុំម្មុយនិស្ត និងគាំទ្រសេដ្ឋកិច្ចបែបសេរី និយម។
ប្រមុខរដ្ឋាភិបាលអង់គ្លេសមិនបានអត់ឧនដល់សហភាពសូវៀត នៅពេលនោះទេ។ លោកស្រី Margaret Thatcher ដែលមិនទុកចិត្តការដឹកនាំនៅអឺរ៉ុបនោះ បានប្រឹងប្រែងហាមឃាត់មិនអោយមាននុយក្លេអ៊ែរ និងសកម្មភាពរបស់អង្គការOTAN។ ហើយបន្ទាប់ពីនោះមក លោកស្រីបានសំដែងការគាំទ្រលើកទឹកចិត្តដល់នយោបាយបើកចំហរបស់ ប្រធានាធិបតីរុស្ស៊ី Mikhaïl Gorbatchev។
ទាក់ទងនយោបាយសេដ្ឋកិច្ច Margaret Thatcher ជាអ្នកយល់ស្របចំពោះនយោបាយទីផ្សាររួម ដោយយល់ថានយោបាយនេះជាមធ្យោបាយដែលនាំអោយមានការផ្តោះប្តូរបែបសេរី ។ ទោះយ៉ាងនេះក្តីអតីតប្រមុខរដ្ឋា ភិបាល អង់គ្លេសរូបនេះមិនបានទទួលយកនយោបាយ រូបិយបណ្ណរួម នៅអឺរ៉ុបនោះទេ។
លោកស្រី Thatcher តែងតែគិតប្រយោជន៍ជាតិអង់គ្លេសមុនប្រទេសណាៗទាំងអស់ ពិសេសមុនប្រទេសនានានៅសហភាពអឺរ៉ុប។ ដូច្នេះ លោកស្រីជាដៃគូដ៏ពិបាកបំផុតសំរាប់បណ្តាប្រទេសនៅអឺរ៉ុប។ ប៉ុន្តែលោកស្រី Thatcher នៅតែទទួលបានការគោរពខ្ពស់ពី សំណាក់អ្នកដឹកនាំនានា ដោយសារតែអត្តចរិត និងជំហររឹងប៉ឹងដូចដែកថែបរបស់លោកស្រី៕ដោយ ព្រំ សឿន សូលីណា (RFI)