អូបាម៉ានិយាយថា ប្រទេស៥០ នឹងទទួលយកជនភៀសខ្លួន៣៦០.០០០នាក់នៅឆ្នាំនេះ
សារព័ត៌មាន Cambodia News/
អាមេរិក (២១ កញ្ញា ២០១៦) ៖ ប្រធានាធិបតីអាមេរិក លោក បារ៉ាក់ អូបាម៉ាបានប្រកាសការសន្យាដែលធ្វើឡើងដោយប្រទេសចំនួន៥០ដើម្បីទទួលយកក្រុមជនភៀសខ្លួនចំនួន៣៦០.០០០នាក់ដែលមកពីបណ្តាប្រទេសដែលហែកហួរដោយសង្គ្រាមនៅឆ្នាំនេះ។
លោក បារ៉ាក់ អូបាម៉ា បាននិយាយនៅឯសម័យប្រជុំមហាសន្និបាតអង្គការសហប្រជាជាតិកាលពីថ្ងៃអង្គារទី ២០ កញ្ញាថា ក្រុមមេដឹកនាំពិភពលោកជាពិសេស មេដឹកនាំអាល្លឺម៉ង់និងកាណាដាបានប្តេជ្ញាទទួលយកជនភៀសខ្លួនចំនួនទ្វេដងចាប់ពីឆ្នាំមុនមក។
អង្គការសហប្រជាជាតិបាននិយាយថា ជនភៀសខ្លួនជិត២១លាននាក់បានបង្ខំចិត្តរត់ភៀសខ្លួនចេញពីប្រទេសរបស់ពួកគេ ដោយសារសង្គ្រាមឬការធ្វើទុក្ខបុកម្នេញ។
មនុស្ស៩លាននាក់បានផ្លាស់ទីជម្រកដោយសារសង្គ្រាមរយៈពេល៦ឆ្នាំនៅស៊ីរី ខណៈដែលមនុស្សជាង៤លាននាក់ផ្សេងទៀតបានរត់ភៀសខ្លួនចេញពីប្រទេសស៊ីរី។
ការប្រកាសរបស់លោក បារ៉ាក់ អូបាម៉ា ក៏បានរួមបញ្ជូលទាំងការសន្យាដោយប្រទេសជាច្រើនដើម្បីបង្កើនប្រាក់ជំនួយដល់ក្រុមអង្គការផ្តល់ជំនួយមនុស្សធម៌របស់អង្គការសហប្រជាជាតិចំនួន៤,៥ពាន់លានដុល្លារច្រើនជាងឆ្នាំមុន៕
