២នាក់ស្លាប់ និងជាច្រើននាក់ទៀតបាត់ខ្លួនក្នុងគ្រោះទឹកជំនន់នៅវៀតណាម
សារព័ត៌មាន Cambodia News/
វៀតណាម (១៦ កញ្ញា ២០១៦) ៖ ស្ថានីយទូរទស្សន៍រដ្ឋ VTV បានរាយការណ៍កាលពីថ្ងៃព្រហស្បតិ៍ថា មនុស្ស ២នាក់ស្លាប់ និងជាច្រើននាក់ទៀតកំពុងបាត់ខ្លួន ខណៈដែលភ្លៀងធ្លាក់ខ្លាំងបង្កឲ្យមានទឹកជំនន់ និងការរអិលបាក់ដីនៅភាគកណ្ដាលប្រទេស វៀតណាម។
នៅក្នុងខេត្តតាន់ហាវសាកសពមនុស្ស ២នាក់ត្រូវបានរកឃើញ ក្រោយពេលដែលហេតុការណ៍រអិលបាក់ដី បានវាយប្រហារមកលើខ្ទមមួយខ្នងជាកន្លែងដែលមនុស្ស ១០នាក់កំពុងជ្រកភ្លៀង។ មនុស្ស ៣នាក់បានរស់រាន និង ៥នាក់ផ្សេងទៀតកំពុងបាត់ខ្លួន។
សាលារៀនត្រូវបានបង្ខំបិទទ្វារ ហើយផ្លូវថ្នល់ត្រូវបានទឹកហូរកាត់ពីលើទុកឲ្យមនុស្សជាង ៣០០គ្រួសារជាប់ខ្លួន។ សូមបញ្ជាក់ថា តំបន់ភ្នំនៅភាគកណ្ដាលប្រទេសវៀតណាម តែងតែរងគ្រោះដោយសារទឹកជំនន់បណ្ដាលឲ្យមានគ្រោះថ្នាក់ដល់មនុស្ស និង ខូច ខាត ដំណាំប្រជាពលរដ្ឋផងដែរ៕
